1 Temceo 6

1Jo ducu ma gin tye opii, omyero guti ki luditogi macalo jo maromo awora i yo ducu, wek ngat mo pe oyet nying Lubanga nyo pwonywa. 2Jo ma luditogi dong guye Rwot, myero pe gukwer worogi, ni pien gin dong gibedo omego, ento myero gumede me tiyo tic maber makato botgi, pien jo ma gin konyogi ki ticgi gubedo jo muye Rwot dok jo ma gin maro.

Pwony me goba ki lonyo me ada

Pwony lok magi dok icuk cwiny dano iye. 3Ka ngat mo pwonyo mere lok mapat kun pe lubu lok ada pa Rwotwa Yecu Kricito ki pwony makelo kwo me woro Lubanga, 4nongo en dong okete malo kene ki wake, ento pe ngeyo gin mo kadi wa ki acel. Nongo iye opong ki par maracu me pyem ki da ikom nyig lok mogo; dong lok macalo meno tye iye nyeko, pyem, yet ki par maracu mamiyo gen rwenyo woko ki ikin dano. 5Dok bene miyo jo ma ryekogi obale, ma mako lok me ada oloyogi woko, gibedo ki pyem i lok nono, kun bene gitamo ni dini aye yo me nongo lonyo. 6Lonyo dit tutwal idini kace iyeng ki gin mo keken ma itye kwede. 7Pien wan yam pe wakelo gin mo i lobo kany, dok bene pe wabitwero tero gin mo ka wa a ki i lobo. 8Ento ka watye ki cam ki ginaruka, jami magi romowa gire. 9Ento jo ma mito bedo lulonyo miyo Catan bitogi ci gipoto ibal ka dong gimoko i owic pa Catan pi mitigi mapol me mingo maracu ma tye ka unugi, miyo girwenyo dok gito woko matwal. 10Pien maro lim en aye acaki me gin maracu ducu; man en gin ma omiyo jo mogo gua woko ki i niye, ka dong gurwate ki lwak can mapol ata mucore ikomgi.

Lweny maber me niye

11Ento in dano pa Lubanga, leng yo ki jami meno ducu, ket cwinyi ikit ma atir, ilworo Lubanga, ki iniye, imar, idiyo cwiny ki imwolo. 12Lweny lweny maber me niye; mak kwo ma pe tum matek mayam kilwongi iye ikare ma itucu niyeni inyim lucaden mapol ata. 131 Aciki inyim Lubanga mamiyo kwo bot jo ducu, ki inyim Yecu Kricito, ma otucu niyene maber ikare ma miyo lok me cadene inyim Pontio Pilato. 14Gwok cik ma kimiyi, bed labongo kit roc mo nyo lok mo ma kijuki iye, nio ka Rwotwa Yecu Kricito binen. 15Lubanga ma kipwoyo, en acel keken aye Won Twer, en Rwot pa luker ducu, ki Rwot pa rwodi, en binyutu man ka karene kikome dong oromo. 16En Lubanga acel keken ma pe to, ma bedo i dero mo ma ngat mo pe romo nyiko cok kwede, cake con ngat mo pud pe munene, dok bene dano mo pe twero nene. Woro ki twer ma pe gik obed bote. Amen.

17Cik lulonyo me kare man ni guwek wake, dok bene pe guket gen gi ikom lonyo ma pe geneni, ento guket gen gi ikom Lubanga ma miyowa jami ducu mabup ma yomo cwinywa. 18Myero guti tic mabeco, gubed lulonyo itimo ber bot dano, ki ipoko jami, ki imiyo mot ki yomcwiny. 19Ka gutimo meno, nongo gukano mono maber pirgi ken gi pi kare me anyim, wek gunong kwo ma en aye obedo kwo me ada.

20Ai Temceo, gwok gin mayam dong kimiyo i cingi. Gwoke ki boko lok mogo ma pe me woro Lubanga, ki ipyem mogo ma a ki igin ma kilwongo gobagoba ni, “Ngec”, 21pien jo ma giwaco ni gitye ki kit ngec meno miyo gipwayo piny nono i lok ma mako niye, kun girwenyo woko matwal ilok ma mako niye.

Kica pa Lubanga obed kwedi.