2 Temceo 1

Mot

11

Waraga man oa ki bot Paulo ma lakwena pa Kricito Yecu pi mit pa Lubanga, malube ki cikene me miyowa kwo ma wok ki i Kricito Yecu.

2Bot Temceo latina ma amaro: Lubanga Won ki Kricito Yecu Rwotwa omini gum, kica ki kuc.

Pwoc ki cuku cwiny

3Apwoyo Lubanga ma atiyo bote tic ki tam maleng, macalo kwariwa yam gutiyo bote, kun alwongo nyingi ilegana me kare ducu. 4Ka apo pig wangi, miyo i dyeceng ki dyewor aparo me neni, wek apong ki yomcwiny. 5Apo ikom niyeni ma goba pe iye, mayam kong okwongo bedo bot dani Loi, ki meni Yuneki, ma angeyo atir ma pe akalo akala ni tye boti bene. 6Man omiyo apoyo wi me tic ki cwinyi ducu ki mot me kica mayam Lubanga omiyo ki in ikare ma aketo cinga iwii. 7Pien Lubanga yam pe omiyowa cwiny me lworo, ento omiyowa cwiny me teko ki me mar ki me juke kenwa.

8Pimeno lewic pe omaki me miyo caden ikom Rwotwa, lewic bene pe omaki ikoma, an ma abedo lamabuceni, ento ribe kwedwa iciro can pi lok me Kwena Maber, iteko pa Lubanga. 9En olarowa dok olwongowa me bedo jo maleng, pe pi tic mogo ma wan watiyo, ento pi lubu yub ma mere, ki pi kicane mayam en omiyo botwa i Kricito Yecu i acaki piny. 10Kombedi dong kinyutu woko botwa ibino pa Lalarwa Kricito Yecu madong okwanyo to woko matwal, ci omiyo kwo ma bedo matwal onen woko kamaleng pi lok me Kwena Maber. 112 Pi lok me Kwena Maberi, oweko yam kiketa abedo latit lok, lakwena ki lapwony bene. 12Man en aye gin ma omiyo aneno can kit macalo atye ka nenone wa i kareni. Ento lewic pe maka gira, pien angeyo ngat ma aye, dok bene ageno atirni, en twero gwoko gin ma omiyo i cinga nio i Nino maca. 13Nen ni imako pwony me ada mayam iwinyo ki bota, kun ilubu kwede niye ki mar matye i Kricito Yecu. 14Gwok gin maber ma kimiyo i cingi pi kony ma Cwiny Maleng ma bedo i iwa miyowa.

15In i ngeyoni, jo ducu matye i Acia dong guloko ngegi woko bota. Pugelo gin ki Kermogen gitye ikin gi. 16Alego Rwot ni omyero otim kica ikom paco pa Oneciporo, pien yam obedo ka dwoko cwinya tyen mapol. Lewic pe omake pi twec ma kitweya kwede ki nyor, 17ento ikare ma en oo i Roma oyenya matek nio ka ononga. 18Rwot omyero omii en onong kica ma a ki bote i Nino maca. Dok in bene ingeyo maber mada kit kony ma en obedo ka miyone i Epeco.