2 Temceo 2

Acikari pa Yecu Kricito ma lawiny

1Latina, in dong ibed matek i kica ma kimiyowa i Kricito. 2Pwony madong ityeko winyo ki bota inyim lucaden mapol, in bene myero itit bot jo ma gene ma giromo pwonyo ki jo mukene. 3Cir arem me gin marac ma kitimo ikomi, macalo acikari pa Yecu Kricito ma lawiny. 4Acikari matye i dog tice tame tye ni myero eyom cwiny ladite, piman en dok pe a woko kun dok rwake itiyo tic mo mukene mapat. 5Lapyem ituku pe twero loyo tuku ka pe olubu cik me tuku meno kikome. 6Lapur ma en latic matek i potone en aye ma omyero okwong camo gin ma ocek iye. 7Tam gin ma aloko, pien Rwot bimiyo iniang i iye ducu.

8Po ikom Yecu Kricito, ma ocer ki ikin jo ma oto, en lakwar Daudi, kit macalo an atito kwede lok me Kwena Maber. 9Lok meno me Kwena Maber en aye gin ma atye ka ciro can pire, kun kitweya woko ki nyor calo kitweyo labalo! Ento pe kitweyo lok pa Lubanga gire. 10Meno en gin ma omiyo atye ka ciro arem kare ducu, pi jo ma ki yero, wek gin bene gunong lare matye i Kricito Yecu, kacel ki deyo ma pe gik. 11Lok man lok ada ni:

“Ka wato kwede, wabikwo kwede bene, 121

ka waciro can, wabibedo kaloc kacel kwede;

ka wakwere, en bene bikwerowa;

13ka wan jo ma pe gene, en gire gene nakanaka,

pien en pe twero kwere kene.”

Latic ma kipwoyo

14Po wigi ikom lok man, dok icikgi inyim Rwot ni gin guwek pyem ite lok mapatpat, pien meno pe konyo gin mo, ento dok mede me balo jo ma winyo abala. 15Ket tek kit macalo itwero pi mine keni bot Lubanga macalo ngat ma kipwoyo, latic ma pe ki gin mo ma lewic myero omake iye, ma pwonyo lok me ada i yo ma atir. 16Kwer boko lok ma pe me woro Lubanga, pien lok ma kitmeno mede ki rwenyo dano arwenya iworo Lubanga, 17dok bene lokgi bitucu yone calo bur ma camo kom dano oyotoyot. Kumenayo gin ki Pileto gitye ikin jo meno. 18Dong gungak woko ki ilok ada kun giwaco ni wan dong wacer con. Man gin tye ka balo kwede niye pa jo mogo. 192 Ento guti me pwony man Lubanga dong oketo tye ma ocung woko matek liking, ma bene tye ki coc man ikome ni, “Rwot ngeyo jo ma gin jone kikome,” dok ni, “Dano acel acel ma lwongo nying Rwot omyero opoke woko ki ibal.”

20I ot mo madit, pe bedo iye jami me jabu ki ryal keken, ento bedo iye bene jami mogo ma kitiyo ki bao ki ma kitiyo ki lobo; mogo kitiyo kwedgi ikare me deyo keken, ento mukenegu kitiyo kwedgi ikare ducu. 21Kace ngat mo olonye kekene, kun oweko bedo ki kit marac woko, en bibedo atabo ma kitiyo kwede ikare me deyo, ma bedo maleng, ma konyo won ot, ma oyube pi tic ducu maber. 22Wek miti me bulu obedi, ento ket tami ibedo ki kit ma atir, niye, mar ki kuc, kacel ki jo ducu ma kok bot Rwot kun igi leng. 23Kwer pyem me mingomingo ma bino pi kwiya pinygu woko; in i ngeyoni kodi pyem macalo meno kelo da. 24Latic pa Rwot myero obed ngat ma pe daa atata, myero obed ngat ma lakica bot dano ducu, lapwony ma ladiro, ngat ma diyo cwinye, 25ngat ma tiro jo ma pyem kwede ki mwolo. Gwok nyo Lubanga bimiyogi cwiny me ngut, ka wek dong guniang maber ikom lok ada, 26miyo ryekogi dwogo, ci gibwot ki i owic pa Catan ma onongo yam omakogi, omiyo gutiyo gin ma en mito.