1 Temceo 5

Tic bot utmege

1Pe itwak ladit mo, ento cuk cwinye macalo woru; omyero inen awobe macalo omegini, 2nen mon madongo macalo mego, ki mon matino myero inengi macalo lumegini, labongo tam mo marac.

3Wor mon ma coggi oto, madong gudong ken gi. 4Kace dako ma cware oto tye ki lutinone ki likwaye, myero gin kong gukwong pwonyo ticgi me dini i odigi gin kikomgi, kun gimiyo kony bot lunyodogi pi kony mogo mayam gumiyo botgi, pien meno aye Lubanga pwoyo. 5Dako ma cware oto ma odong kene labongo ngat mo ma konye, keto gene ducu ikom Lubanga, dok bene bako doge kun lego Lubanga dyeceng ki dyewor. 6Ento dako ma cware oto ma yenyo mere yomcwiny me kom keken, nongo dong oto kadi bed pud kwo. 7Ket cik man, wek gubed labongo lok mo ma kijukugi iye. 8Kace dano mo pe miyo gin mo me konyo wadine, makato pi jo me ode kikome, nongo dong okwero niyene woko, dok bene odoko rac makato ngat ma pe oye Lubanga.

9Pe myero kicoo nying dako ma cware oto, macalo dato, ma mwaka me dite peya oromo pyere abicel nono. Medo ikom meno en myero obed dako mayam obedo ki laco acel keken. 10Myero kinen ka tice ber, kace yam opito lutino, ka yam ojolo welo, nyo olwoko tyen jo pa Lubanga, ka okonyo jo mayam giunugi, dok bene ka obedo ngat mayam omine kene i tiyo gin maber i yo ducu. 11Ento myero ikwer coyo mon ma pud gitino ma coggi oto; pien miti me komgi twero miyo gikwero Kricito woko, gicako mito nyome doki aye, 12miyo kingolo kop loyogi pi turu cikegi mukwongo. 13Medo ikom meno, giloke gidoko luwackom ma gibibedo kawot awota i ot ki ot; pe gibedo luwackom keken, ento gidoko bene jo ma loko lok atata, ma giroyo wigi igin ma pe meggi, gibedo kaloko lok ma pe myero guloki wa ki acel. 14Pimeno, omiyo amito ni mon matino ma cogi oto kinyomgi wek gunywal lutino, gulo odigi, wek pe gumi kare ki lukworwa me loko gin mo marac ikomwa. 15Pien jo mogo ikin gi dong gungak woko, gitye kalubu Catan. 16Kace dako mo muye Rwot tye ki wadine ma gin mon to, ci myero en omii botgi kony, wek pe kinur lwak muye Yecu ki lego kony, ento lwak muye Yecu gubed ka konyo mon ma cogi oto ma lakonygi mo peke.

17Ludongo maloyo loc maber myero kiworgi tutwal, makato myero kiwor jo matye ka yele katito lok ki pwonyo dano. 181 Pien lok mayam kicoyo waconi, “Pe itwe dog twon ka tye ka nyono bel,” dok bene ni, “Latic myero kicule mucarane.” 192 Pe iye lok adot mo ma kikelo ikom ladit mo, gwok nyo ka tye lucaden aryo nyo adek macalo ginacoya owaco. 20Dong jo ma pud ocung ikom balgi, myero ijukgi inyim dano ducu, wek omii jo mukene gubed ki lworo. 21Aciki inyim Lubanga ki Kricito Yecu ki lumalaika ma ki yero, gwok cik magi ma pe ilenge ikom dano mo keken. 22Dok bene pe irune me keto cingi ikom ngat mo, nyo me ribe ki jo mukene i balgi; ento gwoke ibed maleng.

23Cake kombedi, dong pe imat pii keken, mat bene kongo bwino manok pi konyo ii pi two ma maki kare ki kareni.

24Bal pa jo mogo nen woko kamaleng ma cimo atir ni kop biloyogi, ento bal pa jo mukene nen lacen. 25Tic maber bene nen woko kamaleng; kadi pe kitmeno, pe kane matwal ma pe binen.