1 Temceo 4

Lupwony ma lugoba

1Cwiny Maleng waco atir ni, ikare mo ianyim jo mogo bibwoto niyegi woko, gicako lubu jogi ma gin lugoba, ki pwony pa cen. 2Pwony ma kitmeno a ki bot jo ma luroro ma gin lugoba, ma tam ma i igi ma nyutu botgi balgi oding woko macalo del kom dano ma kiwango ki nyonyo malyet. 3Gin jonu gijuku ni dano pe gunyom, dok bene giciko dano ni gukwer cam mogo, kun Lubanga yam oketo cam wek jo ma ye en, ma gingeyo lok me ada, gugam ki pwoc. 4Pien jami ducu ma Lubanga ocweyo gibeco, pe tye mo ma myero kikwer ki ikin gi, kace onongo kigamo ki pwoc; 5pien lok pa Lubanga ki lega lonyogi bedo maleng.

Latic pa Yecu Kricito maber

6Ka iketo pwony magi inyim utmego, ci i bibedo latic pa Kricito Yecu maber, ma kipito ki lok me niye ki pwony mabeco ma ibedo kalubuneni. 7Kwer lok mogo me mingo ma tere peke ma pe me lworo Lubanga. Pwonye keni i kwo me lworo Lubanga. 8Pwonye me rweyo ler kom tye ki kony, ento konye nok; lworo Lubanga konyo i yo ducu, pien twero kelo botwa gum ikare man ki i kwo me kare ma bibino i anyim, macalo Lubanga yam ociko. 9Lok man lok ada, myero dano ducu guye. 10Meno aye gin ma omiyo wacane dok wacuke me tic matek, pien waketo genwa ikom Lubanga makwo, ma en Lalar pa jo ducu, ento makatone pa jo ma ye Yecu.

11Cik lok magi dok ipwony ki dano. 12Pe imii ngat mo ocayi ni pien in pud itidi, ento bed lanen maber bot jo muye, iloki, ikiti, imar, iniye, ki ibedo maleng labongo gin marac mo ikomi. 13Nio ka abino, mii kare ni me kwano coc mayam kicoyo inyim lwak, kun itito lok, ki ipwonyo bene. 14Pe ibwot mot me cwiny ma itye kwedeni obale nono, mayam kimii pi lok me nebi ma lutit lok pa Lubanga gutito ikare ma ludongo guketo cinggi iwi. 15Nyut lok magi ki tic, ket cwinyi iye, wek dano gunen kit ma itye kawot kwede anyim. 16Gwoke keni, dok igwok pwonyi bene; mak matek, pien ka itimo kumeno, in kikomi ibilare kacel ki jo ma winyi bene.