1 Temceo 3

Lutela ma i Kanica

1Lok man lok me ada. Kace dano mo mito tic me bedo latela jo pa Lubanga, nongo en mito tic maber. 21 Latela myero obed labongo lok mo ma kijuke iye, obed ki dako acel, ogwoke kene, obed ryek, obed dano ma kiworo. Obed dano ma gwoko welo, lapwony maber, 3ma pe lamero kongo, ma pe lakolo, ento obed dano mamwol, ma pe da atata, dok pe obed ngat ma maro lim. 4En myero obed ngat ma loyo ode maber kun gwoko lutinone miyo gibedo ki winy bot jo madito, ma giworo dano i yo ducu. 5Pien kace dano mo pe loyo ode kikome maber, ci en twero gwoko lwak jo muye Lubanga ningning? 6Myero pe obed dano ma pud oloke aloka nyen i niye, miyo kete malo ki wake, ci poto woko cut, lok loye macalo yam oloyo Catan. 7Medo ikom meno myero en obed dano ma jo ma woko pwoyo, wek pe okel yet mo ikome ma miye poto i owic pa Catan.

Lukony tic i Kanica

8Kitmeno, ludikon myero bene gubed jo maromo awora, jo ma pe doggi aryo, ma pe gin lumat kongo matek tutwal, pe gubed bene luworo me nongo lim; 9myero bene gubed jo ma mako lok maber me mung pa Lubanga pi niyewa ma gicung iye matek, kun cwinygi bene leng. 10Myero kong kikwong temogi; kace kinongo ni lok mo pe marac ikomgi ka dong kiyegi guti tic me dikon. 11Mon bene kitmeno, myero gubed mon maromo awora, ma pe lucok dog dano, gubed jo ma gwoke ken gi dok jo ma lugen i jami ducu. 12Ludikon myero gubed wegi mon acel acel, omyero gulo lutinogi ki odigi bene ducu maber, 13pien ludikon ma gitiyo tic mabeco ginongo rwom maber pirgi ken gi, dok gidoko jo ma cwinygi tek ikom niye matye i Kricito Yecu.

Mung madit

14Atye ki gen me bino boti pi oyot, ento acoyo lok me pwony man boti, 15ka agale, ci inge kit ma myero dano obed kwede ikin jo me ot pa Lubanga, ma en aye lwak jo muye Lubanga makwo, ma en aye obedo wir ki guti me te ot matek, me ada. 16Mung me dini ma watucu pire ni dit tutwal:

Yam en onyute ical pa dano,

Cwiny Maleng onyute ni en kite atir,

lumalaika bene gunene,

kitito pire bot lurok mapol,

kiye lok kome iwi lobo ducu,

ka dong kitere woko ipolo malo i deyo.