1 Temceo 2

Kit me woro i kanica

1Lok mukwongo aciko in ni, bako dog, lega, lega ma kilego pi jo mukene, ki miyo pwoc, omyero kitim pi dano ducu, 2pi luker ki jo ducu matye irwom mamalo, wek omii Lubanga okony luloc i tic gi ci wan bene wabibed mot labongo ayela, kun waworo Lubanga ma kitwa dok watiyo gin mabeco i yo ducu. 3Man ber, dok Lubanga Lalarwa bene pwoyo. 4En mito laro jo ducu, dok mito ni jo ducu gunge lok me ada. 5Pien Lubanga tye acel, ngat ma ribo Lubanga ki dano bene tye acel, ma obedo dano, en aye Kricito Yecu. 6En omine kene me bedo gin kok pi jo ducu; meno en aye caden mayam kimiyo i karene kikome. 71 Pi lok man, kiketo an me bedo latit lok dok lakwena, (aloko lok ada, goba pe iye) an lapwony pa Lurok, i niye ki ilok ada.

8Man aye gin ma omiyo amitoni co myero guleg Lubanga i kabedo ducu, kun gitango cinggi malo labongo kiniga nyo daa mo. 92 Kitmeno, mon bene omyero guruke maber ki mwolo, kun gigwoke, pe i yer wic ma kikedo, nyo jabu, nyo tiko ngut, nyo ruk mogo me wel mamalo, 10ento bergi myero onen i tic maber ma gitiyo, meno en gin mamite bot mon ma gilwonge ken gi ni gin jo ma woro Lubanga. 11Dako myero opwonye laling ling kun bedo ki winy. 12An pe aye ni dako mo opwony dano nyo obed ki twero ikom laco; ento omyero obed oling alinga. 133 Pien Adam aye ma kikwongo cweyone, ka dong lacen kicweyo Kawa. 144 Dok bene yam pe kibwolo Adam, ento kibwolo dako, ci omiyo en opoto i bal odoko labalo. 15Kadi bed kumeno, dako kibilaro ikare me nywal, kace omede kabedo ki niye dok ki mar, kun bedo maleng ma gwoke kene.