1 Temceo 1

Mot

1Waraga man oa ki bot an Paulo ma lakwena pa Kricito Yecu pi cik pa Lubanga Lalarwa ki Yecu Kricito ma genwa ocung ikome. 21

Bot Temceo latina me ada i niye. Lubanga Won ki Kricito Yecu Rwotwa omii gum, kica, ki kuc.

Juku pwony me goba

3Macalo nene kong abako doga boti ikare ma acito i Makedonia, amitoni kong idong i Epeco wek icik jo mukene pe gupwony pwony mo mapat. 4Pe bene guket cwinygi ilok me ododo ma giboko ikom kwarigi, ki lubu nying ducu ma kiryeyo pa kwarigi macon, makelo tam atata, dok pe konyo yub pa Lubanga ma ocung ikom niye. 5Gin ma omiyo yam aciki ki lok man en aye ni iwek dano gubed ki mar ma dano bedo kwede ka cwinygi leng dok ma kitgi ber ma gipeke ki bal mo ikomgi, dok ma niyegi goba mo peke iye. 6Jo mogo gungak woko ki ikom lok man ci gudonyo ka boko lok atata ma konye peke. 7Gin gimito bedo lupwony cik pa Lubanga, ma kun bene pe giniang kadi wa lok ma giloko, nyo kadi gin ma gitye kalok ikome, ma gucung iye matek tutwali.

8Wan wangeyo ni Cik ber ka dano otiyo kwede i yo ma cik mito. 9Omyero kong waniang ni, cik pe kiketo pi jo ma kitgi atir, ento kiketo pi lutur cik ki pi jo ma gin pe luwiny, ki pi jo ma pe lworo Lubanga ki pi lubalo, kiketo pi jo ma pe gileng, jo ma pe keto cwinygi ikom Lubanga, pi jo ma neko won gi ki jo ma neko megigi, pi lunek dano mukene, 10dok pi jo ma timo tim kwele, jo ma butu ki co luwotgi, jo ma kwalo dano ci girwenyo kwede woko alii, lugoba, jo ma kwongo kwong labongo tere, ki kit gin mukene ducu ma pe rwate ki pwony me ada. 11Meno aye pwony ma nonge ilok me Kwena Maber mayam gimiya me atita, lok maber ma tito pi deyo pa Lubanga ma kipwoyo.

Pwoc pi kica pa Lubanga

12Amiyo pwoc bot Kricito Yecu Rwotwa en ngat ma miya teko me tiyo tic man, pien dong okwana me bedo lagen, ka dok bene oketa i tice, 132 kadi bed yam abedo kaloko lok marac ikome, ki aketo tim gero matek ikom jone wa ki kelo ayela ikome. Ento en otima kica, pien ceng atimo meno ki kwiya piny labongo niye, 14ci kica pa Rwotwa omede tutwal ikoma kacel ki niye ki mar matye i Kricito Yecu. 15Lok man lok me ada, myero dano ducu guye ni, Kricito Yecu yam obino i lobo pi laro lubalo. Ikin lubalo an aye abedo labal maloyo ducu. 16Ento en otima kica pi lok man, wek ikin lubalo, Yecu Kricito okwong nyutu diyo cwinye maberi bota macalo lanen bot jo mukene ma gibiye en, ka dong gicako nongo kwo ma pe tum. 17Woro ki deyo obed nakanaka bot Rwot madit maloyo kare ducu, ma pe to, ma pe nen, en Lubanga acel kene. Amen.

18Latina Temceo, amiyo boti cik man ma rwate ki lok me nebi mayam lutit lok pa Lubanga guloko ikomi, wek ka ilubu lokgi ci biweko ilweny lweny maber, 19kun nongo imako niye matek ma tam ii leng. Pi kwero tam pa jo ma ongak woko ma i igi nyutu botgi balgi ento pe gi yee lok me ada, jo mogo macalo meno dong niyegi obale woko. 20Jo mogo ikin gi obedo macalo Kumenayo ki Alegijanda, yam amiyogi woko i cing Catan wek gupwonye guwek yeto Lubanga.