2 Jo Tecalonika 3

Wuleg pirwa

1Me agikine, utmegiwa, wuleg Lubanga pirwa, wek lok pa Rwot owinye kun ywek woko oyotoyot, wek dano guket iye deyo kit macalo bene otime ikinwu, 2dok bene wek walare ki i cing jo maracu, ma kitgi obale woko; pien jo mogo pe gitye ki niye. 3Rwot gene, en bimiyowu teko, dok bigwokowu ki ikom gin marac. 4Watye ki gen i Rwot ikomwu ni, wutye katiyo gin ma nene wacikowu ni wutii, dok bene wubimede kitiyone. 5Rwot myero otel cwinywu nio wa i mar pa Lubanga ki i diyo cwiny ma a ki bot Kricito.

Dano myero guti tic

6Utmegiwa, kombedi wacikowu inying Rwotwa Yecu Kricito ni, wupoke woko ki ikom ominwu mo ma lawackom ma bedo kawire kun balo kare nono labongo tic mo, ma pe lubu kit ma myero ma wun wumako ki botwa. 7Wun ki komwu wungeyo kit ma myero wulub kwede kitwa. Ikare ma nene watye botwu pe wabedo luwackom kun wabalo kare nono labongo tic mo. 8Wan yam pe wacamo cam pa ngat mo labongo culune, ento wacane i tic dyeceng ki dyewor wek pe waket peko ikom dano mo ikinwu ki lego kony. 9Pe teloke ni wan wapeke ki twero, ento wamine giwa kenwa me bedo lanen ma myero wun wulubi. 10Pien kadi ikare ma onongo watye botwu, wamiyowu cik man ni, ngat ma dag tic myero wutwon cam woko. 11Pien wawinyo ni jo mogo ikinwu komgi wac, gibedo kawire kun gibalo kare nono ma pe gitiyo tic mo, ento giroyo wigi i tic pa jo mukene. 12Waciko kodi dano macalo meno, dok wabako dogwa botgi i Rwot Yecu Kricito ni, myero guti ticgi mot, wek ngat acel acel opite gire kene.

13Utmegiwa, pe wuol katiyo gin maber. 14Ka ngat mo okwero lubu lok ma kicoyo i waraga man, myero wuniang maber ikom dano meno, pe wuribe kwede, wek lewic omake. 15Pe wunene macalo lakworwu, ento wucike macalo ominwu.

Lego gum

16Rwot ma en won kuc omiwu kuc ikare ducu, i yo ducu. Rwot obed kwedwu ducu.

17An Paulo acoyo botwu mot man ki cinga. Man aye lanen matye i waragana ducu; man aye kit ma acoyo kwede.

18Kica pa Rwotwa Yecu Kricito obed kwedwu ducu.