2 Jo Tecalonika 2

Latim bal

11

Utmegiwa, lok ikom dwogo pa Rwotwa Yecu Kricito ki cokewa me rwate kwede, wabako dogwa botwu ni, 2pe wuwek tamwu oryange oyotoyot, cwinywu bene myero pe opoti, kadi pi lok ma wuwinyo ki bot lanebi mo nyo pi lok ma kitito, nyo kadi pi waraga mo ma kiwaco ni oa ki botwa, ma tito ni, nino pa Rwot dong oo. 3Pe wuwek ngat mo obwolwu i yo ducu, pien nino meno pud pe bibino, nio wang ma jemo ikom Lubanga kong obedo tye, dok bene nio wang ma latim bal onen, ma en aye ngat ma agikine tye imac me geena. 42 En pyem, dok kete kene me bedo malo maloyo gin ducu ma kilwongo ni lubanga, nyo gin mo ma giworo; dok bibedo iwi kome i ot pa Lubanga, kun nyute kene ni en Lubanga. 5Pe wupo ni yam atitiwu lok man ikare ma pud atye botwu? 6Wungeyo bene gin matye ka genge i kareni, wek onen ka dong kare oromo. 7Pien twero mukane pa latim bal kombedi dong tye katic; ento gin ma myero otime pe bitime nio ka ngat ma genge dong kikwanye woko. 83 Lacene dano man ma en latim bal binen, ci ka Rwot Yecu bituc ci bityeke woko ki deyo me dwogone. 94 Latim bal man bibino ki teko pa Catan ki lanyut mogo ki tango mogo me goba, 10dok bibedo ki lwak bwola maracu pi jo ma birwenyo matwal, pien gukwero maro lok me ada matwero larogi. 11Pimeno Lubanga biketogi ite twero me bwola, wek guye goba, 12wek kingol kop oloo jo ma pe ye lok me ada, ento cwinygi yom i timo gin ma pe tye atir.

Jo ma Lubanga oyero pi lare

13Utmegiwa ma Rwot maro, myero wapwo Lubanga pirwu nino ducu, pien Lubanga okwongo yerowu con wek elarwu pi Cwiny Maleng ma lonyowu wubedo maleng, ki pi ye lok me ada. 14Lubanga olwongowu i man ki lok me Kwena Maber ma watito, wek wunong deyo pa Rwotwa Yecu Kricito. 15Pimeno utmegiwa, wucung matek, wumak kit pwony ma wapwonyowu kwede, i lok nyo ki i coc ma wacoyo i waraga.

16Kombeddi dong alego Rwot Yecu kikome, ki Lubanga Wonwa ma omarowa dok okweyo cwinywa matwal ki gen maber ma obino pi kica, 17wek okwe cwinywu, omokwu matek i tic ki i lok ducu mabeco.