2 Jo Tecalonika 1

Mot

11

Waraga man oa ki bot an Paulo ki Silvano ka Temceo.

Bot lwak jo ma oye Kricito ma gibedo i Tecalonika ma gitye i Lubanga Won ki Rwotwa Yecu Kricito: 2Lubanga Won ki Rwotwa Yecu Kricito omii botwu kica ki kuc.

Ngolo kop ikare me dwogo pa Kricito

3Utmegiwa, wan myero wapwo Lubanga jwijwi pirwu. Omyero wapwoye pien niyewu tye ka dongo matek tutwal, ki mar ma dano acel acel maro ki lawote bene tye ka mede. 4Pimeno wan bene wanyate pirwu ikin jo ma oye Lubanga ikabedo ducu, pi diyo cwinywu ki pi niyewu i aunauna ma giunuwu kwede ki ican ducu ma wutye ka cirone. 5Meno aye lanen ma nyutu kit ma Lubanga ngolo kwede kop atir dok kakare, wek kibikwanwu ni wun jo ma myero i ker pa Lubanga ma wutye kaneno can pireni. 6Lubangawa bitimo gin ma atir: en biketo can ikom jo ma guketo can ikomwu, 7ka dong miyowu yweyo, wun jo ma kiketo can ikomwu, kacel ki wan bene. Meno en bitimo ikare ma Rwot Yecu binen iye ma kun a ki i polo kacel ki lumalaikane matek 8i dye mac ma lyel, ikare ma en biculu kwor ikom jo ma pe ngeyo Lubanga, ki ikom jo ma pe gilubu lok me Kwena Maber ikom Rwotwa Yecu. 92 Kop ma kibingolo ikomgi en aye can me to ma pe gik, kun kiryemogi woko ki inyim Rwot dok ki inyim deyo me tekone. 10Inino meno, ikare ma en bidwogo kun deyone binene i jone maleng, ma nongo giure ikin jo ducu muye en; pien yam dong wuye lok me caden ma watito botwu.

11Meno aye gin ma omiyo walego Lubanga pirwu nino ducu, wek en omii wubed jo ma myero ma kwowu rwate ki lwongo ma en olwongowu kwede, wek Lubanga okonywu ki tekone me cobo mitiwu ducu mabeco ki tic ducu ma wutiyo pi niye. 12Meno bimiyo dano keto deyo inying Rwotwa Yecu Kricito pirwu, dok wun bene wubinongo deyo pire, pi kica pa Lubangawa ki Rwotwa Yecu Kricito.