1 Jo Tecalonika

Waraga mukwongo ma Paulo ocoyo bot

JO TECALONIKA

Lanyut wilok madito ma i buk man

Tecalonika onongo obedo taun madit me kom ker madit pa jo Roma ki i Macedonia. Paulo ocako kanica man ikare ma oa ki i Pilippi. Ento Lujudaya gucako jemo ikom Paulo kun gudoko nyek woko ikome ikare ma en ocako pwony ikom lok mamako kwo pa Lukricitayo bot lurok ma onongo gimito niang dini pa Lujudaya. Piman Paulo oa woko ki kunu ci ocito i Berea. Lacen ma oo i Korint, Temceo ma obedo lawange dok latic lawote ocwalo kwena bote mamako lok ma obedo ka time i kanica ma i Tecalonika.

Waraga pa Paulo me acel bot jo Tecalonika kicoyo me cuko cwiny Lukricitayo ma kunu. Kun en miyo pwoc botgi pi niyegi ki pi margi ma en owinyo pire; kun poyo wigi ikit kwo ma en obedo kwede ikin gi ikare ma en ceng tye kwedgi; ka dok lacen en bene ogamo lapeny mamako lok me dwogo cen pa Yecu i ngom kany. Dano onongo gipenye ni: Lakricitayo mono kace dong oto woko ma Yecu peya odwogo ci en tika binywako kacel i kwo ma labednaka iceng ma Yecu bidwogo? Dok bene ni Kricito mono bidwogo awene? Paulo otito botgi nia gin omyero gumede ki ticgi lalingling kun gumede ki kuru Kricito ki gen labongo akalakala.

Lacim wilok madito ma i buk man

Lanyut

Pwoc ki pak

Cuko cwiny i kwo pa Lukricitayo

Pwony mamako dwogo pa Kricito

Lok me agiki

Ladol telok