1 Jo Tecalonika 3

11

Ikare madong waneno ni pe waromo ciro paro pirwu, omiyo wamoko tamwa me dong woko cen kenwa i Atene, 2ci waoro botwu Temceo, ma en ominwa ki latic pa Lubanga itito lok me Kwena Maber ikom Kricito, wek ojing cwinywu obed tek dok odi cwinywu ikom niyewu, 3wek can magi pe oryang kom dano mo. Wun ki komwu wungeyo ni can ma kitmeno myero opot ikomwa. 4Pien ikare ma pud watye kacel kwedwu watitiwu con ni, ikare mo i anyim wabineno can, madong bene otime woko kit macalo wungeyoni. 5Pi lok man, ikare madong anongo ni pe aromo diyo cwinya, aoro dano botwu wek aniang ikom niyewu, kace labit dano dong obitowu woko, nyo ticwa ma watiyo bene dongo olal nono. 62 Ento kombedi ma Temceo dong odwogo botwa ikare ma oa ki botwu ci okelo botwa lok mamit ikom niyewu ki mar ma wutye kwede, dok bene ni wupo pirwa jwijwi ki kica madwong kun wuparo pi nenowa mada macalo wan bene waparo me nenowu. 7Piman utmegiwa, meno aye gin ma omiyo cwinywa okwe ikomwu pi niyewu, i can ki i un ma giunowa kwede ducu. 8Piman kombedi dong wabedo kwo ka wacung matek i Rwot. 9Kit pwoc ango mupore ma waromo miyo bot Lubanga pirwu, ki pi yomcwiny ducu ma wumiyowa mamiyo cwinywa bedo yom inyim Lubanga? 10I dyeceng ki dyewor walego Lubanga matek tutwal pi nenowu wang ki wang, wek wamed botwu gin murem ikom niyewu.

11Walego ni Lubanga Wonwa kikome, ki Rwotwa Yecu Kricito, myero omii wanong yo me bino botwu. 12Dok walego Rwot okonywu wek wumede matek tutwal i mar, kun ngat acel acel maro lawote ki jo ducu, ikit ma wan wamarowu kwede. 13Kitmeno bene en bijingo cwinywu wek obed tek wek wubed jo maleng labongo lok mo maloyowa inyim Lubanga Wonwa, ikare me dwogo pa Rwotwa Yecu ki jone maleng ducu.