1 Jo Tecalonika 4

Kwo ma Lubanga mito

1Me agikine utmegiwa, walegowu kun wabako dogwa botwu i Rwot Yecu ni, wumede anyim nakanaka me bedo ki kit kwo ma wumako ki botwa, ma yomo cwiny Lubanga, ma wutye kalubuneni. 2Pien wungeyo cik mayam wamiyo botwu ki twero pa Rwot Yecu. 3Gin ma Lubanga mito en ene, ni myero wudok jo maleng dok wuwek tim me kwele obedi. 4Dano acel acel myero onge bedo ki dakone kene1 i cwiny maleng dok me woro. 5Pe wuwek miti me kom obwowu, macalo lurok ma pe gingeyo Lubanga. 6Ngat mo pe otim bal ikom utmegine, dok pe obwole i lok man; pien Rwot kelo pwod i ikom jo ducu ma timo tim magi ducu ma wan yam watito botwu kun wacikowu bene matek. 7Lubanga pe olwongowa ka nyobe ki bal, ento kabedo jo maleng. 8Kitmeno ngat mukwero winyo pwony man, nongo pe okwero dano, ento nongo okwero Lubanga gire ma omiyowu Cwiny Maleng.

9Lok mudok ikom mar me omego, pe myero kico botwu lok mo iye, pien wun ki komwu yam Lubanga dong opwonyowu woko ni wumare kekenwu. 10I ada wun wunyutu marowu ikom utmego ducu matye i Macedonia. Piman wabako dogwa botwu ni wumede katimo kitmeno nakanaka. 11Wuket bene cwinywu kabedo mot, dok dano acel acel bene opar pi tice kun tiyo ki cinge kit macalo wacikowu kwede, 12wek jo matye woko gupwo kitwu, wek pe wubed kalego kony ki bot ngat mo.

Dwogo pa Rwot

13Utmegiwa, pe wamito wubed ma wukwiya lok ikom jo madong guto woko; meno weko wubibedo ki cwercwiny macalo jo mukene ma gipe ki gen. 14Wan waye ni Yecu oto ci ocer woko. Jo ma oto ma kun yam giye Yecu bene gitye kitmeno; Lubanga bikelogi kacel ki Yecu. 15Watito botwu lok pa Rwot ma en owaco ni, wan jo makwo ma wadong nio wa inino me dwogo pa Rwot, pe wabitelo nyim jo madong guto. 16Rwot kikome bilor piny kun a ki i polo ki lwongo me twer, ma dwon lamalaika madite biwinye, tum pa Lubanga bikok. Jo mayam guto i Kricito aye ma gibikwongo cer, 17ka lacen wan jo makwo, ma wadong kibigwarowa kacel kwedgi i pol, wek warwate ki Rwot i dye yamo; ci dong wabibedo kacel ki Rwot nakanaka. 18Pimeno, wukwe cwinywu kekenwu ki lok magi.