1 Jo Tecalonika 2

Tic pa Paulo i Tecalonika

1Utmegiwa, wun ki komwu wungeyo ni, binowa botwu yam pe obedo me nono. 21 Kadi bed waneno can, dok bene kitimo tim me lewic ikomwa i Pilipi macalo wun wungeyo, kadi pyem obedo dwong, Lubangawa omiyo botwa tekcwiny me tito botwu lok me Kwena Maber kamaleng. 3Pien lok ma wakelo pe oa ki itam ma ogom nyo tam ma pe leng, goba bene pe iye. 4Ento kit macalo Lubanga dong opwoyowa, ci cut omiyowa lok me Kwena Maber me atita, wan bene dong watito kitmeno, pe pi yomo cwiny dano, ento pi yomo cwiny Lubanga ma ngiyo cwinywa. 5Wungeyo ni, wan yam pe wabino botwu ki lok me bita, dok bene pe wakano tamwa pi nongo lim, Lubanga aye cadenwa. 6Pe bene wayenyo deyo ki bot dano mo, kadi ki botwu nyo ki bot jo mukene, 7kadi bed onongo watye ki twero me nongo jami ki botwu, pien wan wabedo lukwena pa Kricito. Ento yam wabedo ma wamwol ikinwu macalo mego ma gwoko lutinone. 8Waparo pirwu mada, omiyo nene pe wamito miyo botwu lok me Kwena Maber keken ma oa ki bot Lubanga, ento kadi wan ki komwa dong watyeko mine woko botwu, pien wamarowu dok pirwu tek botwa tutwal.

9Utmegiwa, wutwero po kit ma ceng wacane kwede i tic, ikare ma watitiwu lok me Kwena Maber ma oa ki bot Lubanga, kun watiyo dyeceng ki dyewor wek pe wanurwu ki lego kony mo ki botwu. 10Wun wucadenwa, ki Lubanga bene ngeyo kit ma wabedo kwede maleng dok ma kitwa atir, labongo lok mo ma oloyowa inyimwu wun jo ma oye Yecu. 11Dok wungeyo kit ma waterowu kwede macalo lunyodo tero ki lutinogi. 12Dok wacuku cwinywu bene ni, wulub kit kwo ma myero bot Lubanga ma olwongowu iker ma mere ki ideyone.

13Man aye gin ma omiyo wapwoyo Lubanga kare ki kare, pien cake ma wugamo lok pa Lubanga ma wuwinyo ki botwa, pe wugamo macalo lok pa dano, ento macalo lok pa Lubanga. Ada aye lok pa Lubanga tye bene katic i iwu wun jo ma oye Yecu. 142 Utmegiwa, wun bene wumako kit pa lwak jo ma oye Lubanga matye i Kricito Yecu, ikabedo ducu matye i Judaya. Pien wun bene wuneno can ki bot lutuwu kikome marom ki can ma gin guneno bot Lujudaya, 153 ma ceng guneko Rwot Yecu ki lunebi, ka guryemowa woko bene. Pe guyomo cwiny Lubanga, ento gupyem apyema ki jo ducu! 16Gin bene gutemo gengowa woko me tito lok bot Lurok wek gulare. Man omiyo gumede ameda ki timo gin marac. Ento akemo pa Lubanga dong obino woko ikomgi matwal.

Miti pa Paulo dok me nenogi wang ki wang

17Utmegiwa, ma ceng kipokowa woko kwedwu pi kare manok ikom ento pe i cwiny, watemo tutwal ki miti madwong me nongo yo wek dok wanene kwedwu wang ki wang. 18Yam onongo wamito mada me bino botwu. An Paulo atemo tyen mapol, ento Catan ogengowa woko. 19Genwa ki yomcwinywa ki lalukana me nyatewa inyim Rwot Yecu Kricito idwogone, en gin ango? Pe wun? 20Pien wun aye wubedo deyowa ki yomcwinywa.