1 Jo Tecalonika 1

Mot

11

Waraga man oa ki bot an Paulo ki Silvano ka Temceo.

Bot jo ma oye Kricito ma gibedo i Tecalonika ma gitye i Lubanga Won ki Rwotwa Yecu Kricito:

Kica ki kuc obed botwu.

Kwo ki niye pa jo Tecalonika

2Wamiyo pwoc bot Lubanga jwijwi pirwu ducu kun walwongo nyingwu ilegawa me kare ducu. 3Pien wiwa po inyim Lubanga Wonwa ikit ma wuketo kwede niyewu i tic, ki kit ma wucane kwede pi mar, dok ki kit ma wudiyo kwede cwinywu pi gen ma wutye kwede i Rwotwa Yecu Kricito. 4Utmegiwa ma Lubanga maro, wangeyo ni Lubanga dong otyeko yerowu; 5pien lok me Kwena Maber ma watito botwu yam pe obino botwu i lok keken, ento obino ki teko, ki i Cwiny Maleng kun onongo lok meno odonyo matut icwinywu. Wungeyo maber kit ma wan wabedo kwede ikinwu kun wakonyowu. 62 Wun bene yam wucako poro kitwa ki kit pa Rwot, pien wuye loke ikare ma onongo giunuwu matek ma wubedo ki yomcwiny ma Cwiny Maleng miyo. 7Man omiyo wudoko lanen bot jo ducu muye Yecu ma gitye i Macedonia ki Akaya. 8Pien wumiyo lok pa Rwot owinye, pe i Macedonia ki Akaya keken, ento lok pi niyewu ikom Lubanga dong oywek oromo kabedo ducu, ma wan ki komwa dok pe waromo loko iye gin mo. 9Pien gin ki komgi aye gitito lok mukemowa, kit macalo yam wujolowa kwede, kadi wa kit ma wuloke kwede bot Lubanga, kun wubwoto woro jogi pi woro Lubanga makwo, dok me ada, 10dok wutye ka kuru Wode ma bidwogo ki i polo, mayam en ocero woko ki ikin jo ma oto, en aye Yecu ma olarowa ki i akemo pa Lubanga ma bibino.