Jo Kolocai 4

1Wun wegi opii, wutii ki opiiwu i yo ma opore, kun wungeyo ni, wun bene laditwu tye malo i polo.

Pwony

2Wumede matek ilega ki cwinywu ducu, kun wumiyo pwoc bene. 3Wuleg pirwa bene, wek Lubanga oyab botwa dogola me tito loke, wek watuc mung pa Kricito, pien pi lok meno aye omiyo koni atye i buc kany, 4wek anyut kamaleng ikit ma myero.

5Wubed dok wutii ticwu ki ryeko tutwale inyim jo ma pe guye Yecu, kun wutiyo labongo balo kare mo keken. 6Lok ma wuloko omyero obed lok mamit ma kado oromo maber, wek wunge kit ma omyero wumii kwede lagam i peny pa ngat acel acel.

Mot me agiki

7Ominwa Tukiko ma wamaro, ma obedo latic ma gene, dok latic macalo an i Rwot, bitito botwu lok ducu ma dok ikoma. 8Acwalo en botwu pi lok man kikome, wek en omii wunge kit ma watye kwede kany, dok bene omyero ocuk cwinywu. 91 Acwale me bino kacel ki ominwa mukene ma wamaro, en aye Onesimo; en bene dano ma gene, dok en oa ki botwu. Gin bitito botwu gin ducu madong otime kany. 102

Aristako ma lamabuc lawota omotowu, ki Marako okeyo Barnaba mayam dong acikowu pire; ka en oo botwu omyero wujole maber. 11Yecu ma nyinge mukene Yucito bene omotowu. Jo magi adeki keken aye gin Lujudaya ma gitiyo tic kacel kwedwa kany i ker pa Lubanga. Gukweyo cwinya tutwal. 123 Epapira latic pa Yecu Kricito ma en ngat acel ma oa ki botwu, bene omotowu. En po pirwu kare ducu i legane matek, wek wubed jo ma otegi, kun wuniang maber i gin ducu ma Lubanga mito ma pe wukalo akala wa ki acel. 13An cadene omiyo amoko ni en otiyo tic matek pirwu ki pi jo matye i Laodikia ki Kerapoli. 144 Luka ma en daktar ma wamaro, kacel ki Dema bene gumotowu. 15Wumot utmego matye i Laodikia, dok wumot Nimpa bene kacel ki jo ma oye Kricito ma gicoke i ode. 16Ka dong waraga man kityeko kwanone ikinwu, ci omyero wumii kikwan bene bot jo ma oye Kricito ma gitye i Laodikia, ki wun bene myero wukwan waraga ma jo Laodikia gicwalo botwu. 175 Dok wuwac bot Arkipo ni, “Myero inen ni icobo tic madong igamo i Rwot.”

18An Paulo acoyo botwu lok me mot man ki cinga. Wupo ikom twec man ma gitweya kwede ki nyor. Kica pa Lubanga obed kwedwu. Amen.