Ntogozi 97

Chohile Sekulu Mkulu

1Zumbe Chohile ni seuta! Isi yelelwe!

Visiwa vyose vibwede!

2Maingu na ziza vyamzunguluka,

uwagila na nkanto nuwo umwegamo we ichigoda chakwe cho useuta.

3Moto walongola kulongozi kwakwe,

na kuwatikimya awankondo wakwe ntendele zose.

4Lumwemwe lwakwe lwamulika mweisi,

isi iwona na kuzingiza.

5Magulu yalujuka saviya nta kulongozi kwa Zumbe,

kulongozi kwa Zumbe ywe isi yose.

6Izimbingu zatambalisa uwagilwa wakwe,

na awantu wose wawona ung'azi wakwe.

7Wose wakuvikila matukulu wajelwe soni,

wadya wakweduvila matukulu,

mvikileni Chohile, nyuwe milungu yose.

8Wantu wa Sayuni weva na kutowa nchelejele,

ivijiji vya Yuda vyelelwa,

kwachausa che izinkanto zako weye Zumbe Chohile.

9Zumbe Chohile ni weye sekulu ywe isi yose,

udahi wako utendese kujinka milungu yose.

10Zumbe Chohile awaunga wadya wakwihiwa wavu,

uyo adima uwikazi wa awantu wakwe,

na kuwambula mwe nguvu za wantu wavu.

11Ulangazi wakwe walangaziza wata uwagila,

na wantu wachumile myoyo welelwe.

12Nyuwe wata uwagila mmwelelwe Zumbe Chohile,

ditogoleni idizina dyakwe dikukile.