Ntogozi 96

Chohile Seuta Mkulu

1Mchemeleni nchemo mpya Zumbe!

Mchemeleni Zumbe Chohile nyuwe wantu mweisi yose.

2Mchemeleni Zumbe Chohile na kutogola idizina dyakwe!

Tambalisani wambula wakwe chila zuwa.

3Tambalisani ung'azi wakwe mwa awantu,

ntendwa zakwe za mpituko mwa awantu wose.

4Zumbe Chohile ni mkulu awagilwa kutogolwa kujinka wose,

uyo ogohigwa kujinka milungu yose.

5Kwaviya milungu yose ya awantu sicho chintu,

mna Zumbe Chohile aumbaga izimbingu.

6Ntunyo na ukulu vikulongozi kwakwe,

nguvu na ung'azi vimndani mwa ahantu hakwe hakukile.

7Nyuwe wantu winkeni Zumbe Chohile,

mwinkeni ntogolani na nguvu.

8Mtogoleni Zumbe Chohile mkuka vikuligana ne idizina dyakwe,

igalani malavyo naho mwize mwe Inyumba yakwe.

9Mvikileni Zumbe Chohile mo ukuka wakwe,

isi yose izingize kulongozi kwakwe.

10Wagambileni awantu wose,

“Zumbe Chohile alongoza Isi kaika itogile haikudaha kusogezwa,

nawakantile awantu wose kwa uwagilwa.”

11Mbingu zitowe nchelejele, isi yelelwe,

ibahali ivumile na vyose vimndani mwakwe,

12nkonde zelelwe hamwenga na vyose vimndani mwakwe!

Vikaheza imiti yose ne izimbago vicheme kwa chinyemi,

13Kulongozi kwa Zumbe Chohile akwiza.

Akwiza kuikantila isi.

Nawakantile awantu wose kwa ukanuni wakwe.