Ntogozi 89

Nchemo isi ikatenda mwe nkunto

1Zumbe Chohile, nanicheme mwe ungi wako mkulu kale na kale,

kwa mlomo wangu nanivilikize ukanuni wako umanyike mwe ivyeleko vyose.

2Simanya kugamba ungi wako wekala chipindi chose,

kugamba ukanuni wako naubunkulwe kwembingu.

3Weye walongaga, “Sidamanya lagano na yudya mntu nisagule,

simwelisiza mndima ywangu Daudi,

4‘Nanitogeze icheleko chako kale na kale,

na kutogeza useuta wako mwe ivyeleko vyose.’ ”

5Zumbe Chohile, izimbingu zatogola mpituko zako ne ivintu umbile,

iviya na ukanuni wako, mwe mdugano wa wakanuni.

6Kwaviya ni yuhi kulanga kwe imbiingu akudaha kuliganywa,

na Zumbe Chohile? Mwe ivyumbe vyose vya kwembingu hahana chikwinga weye Zumbe Chohile,

7mwe mdugano wa wakanuni Chohile ogoheswa,

ogofya kujinka vyose vikumzunguluka.

8Zumbe Chohile, Mta Nguvu Zose, ni yuhi esaweye?

Weye Zumbe Chohile, weye wi mta nguvu na ukanuni wako wakuzunguluka.

9Weye walongoza bahali ikujumbwanika,

umo amawimbi yakwe yakayuganika,

weye wayanyamaza.

10Ni weye umhondile zoka Lahabu niyo atenda saviya mntu akomigwe,

kwa udahi wako mkulu kuwahuda awankondo wako.

11Imbingu ni yako, isi nayo ni yako,

kumba isi hamwenga na vyose viyumo.

12Waumbaga chenya na kwamwenyemzi,

Magulu ya Toboli na Helimoni yachemela idizina dyako kwa chinyemi.

13Udahi wako ni mkulu, udahi wako una nguvu zitendese,

udahi wako ukulilisa.

14Uchindedi na uwagilwa ni chegamo cho ulongozi wako,

mbazi na ukanuni vyakulongoila.

15Ujimbiko wi mwa wadya wahinile kukutogola kwa chinyemi,

wakujenda mo ung'azi wako, Weye Zumbe Chohile.

16Welelwa msi wose kwachausa che idizina dyako,

na kwa uwagila wako wachumilwa.

17Kwaviya weye wi ung'azi na nguvu yawo,

kwa wedi wako kuchitenda wahuda.

18Heye, nchinga yetu ni Zumbe Chohile,

seuta ywetu kalawa kwako weye Mkuka ywa Izulaeli.

Ndagano ya Chohile kwa Daudi

19Mwe ichikale walongaga mwe uwoni,

mwa awantu wako wakukile, ukagamba,

“Simwinka nguvu mkankalu, simkweza mbwanga mgakati mwa wantu.

20Mndima ywangu Daudi simtenda seuta,

simjela mavuta yangu yakukile.

21Mkono wangu naumdahize mazuwa yose,

nguvu zangu nazimtende atoge.

22Wankondo wakwe hawadahe kumdanta,

hahana mntu mwavu akunga amzile.

23Naniwahonde awankondo wakwe kulongozi kwakwe,

na kuwakoma wadya wakumsulumiza.

24Ukanuni wangu uchintile nautende hamwenga naye,

mazuwa yose nanimtende mhuda.

25Useuta wakwe naniwangamule,

kulawa kwe ibahali kubula kwe imito.

26Uyo nanigambe, ‘Weye wi Tate na Chohile ywangu,

Luwe lwa Wambula wangu.’

27Nami nanimsagule atende mwelekwa ywangu ywa nkongo,

mkulu kujinka maseuta wose mweisi.

28Mazuwa yose nanike ungi wangu kwakwe,

ne idilagano dyangu kwakwe naditoge kale na kale.

29Nanijenyeze ulweleko lwakwe kale na kale,

welekwa wakwe nawatende maseuta mazuwa yose.”

30“Mna, hegu awelekwa wakwe wanaleka izisigilizi zangu,

hawanatimile imiko yangu,

31uneva wanabalanga amalagizo yangu na hawatozize imiko yangu,

32aho naniwakantile amasa yawo kwa nkome,

naniwatowe kwachausa cho ubanasi wawo,

33mna sanuse ungi wangu kwa Daudi hegu kuhituila ukanuni wangu utende udanti.

34Miye sanileke kudamanya viya chivane, naho sanihitu chiya imilomo yangu ilongile.”

35“Selisa nkanana imwenga du kwa ukuka wangu,

nami sanimgambile Daudi udanti,

36awelekwa wakwe nawajendeleze,

ne ichigoda chakwe cho useuta nachikalise kulongozi kwangu saviya zuwa,

37nachidindimale kale na kale saviya mnenge,

mukuzi mkanuni ko ulanga.”

Ndilo ya haluse

38Mna weye kumwihiwa vitendese seuta ywako asagulwe

kumbela na kumlemela.

39Kuleka viya chivane na miye mndima ywako,

naho kukijela uzavu ichilemba mwe malumbi.

40Kubogozola iviwambaza vyo umzi,

ne izingome zakwe zose kuzihitusa mahame.

41Wantu wose wakujinka hajihi naye wampakula ugoli wakwe,

katenda mta kubelwa ni wantu wakwikala hajiha naye.

42Kuwenka uhuda awankondo wakwe,

wadya wose wakumsulumiza kuwatenda welelwe.

43Iviziha vyakwe kuvitenda mafilifinte,

naho humwinkile wambizi mwe nkondo.

44Ugoli wakwe kuusa,

ichigoda chakwe cho useuta kuchigwisa hasi.

45Kuhunguza amazuwa yakwe yo ubwanga,

kumgubika soni.

Malombolezo ya ukombolwa

46Zumbe Chohile, nowefise kale na kale?

Maya yako nayake saviya moto kubula ini?

47Zumbe Chohile kumbuka ujihi wo wikazi wangu,

mntu kumumba vyabule!

48Ni yuhi akudaha kwikala asekubanika?

Ni yuhi akudaha kweambula mwenye mwe nguvu za mbila?

49Zumbe Chohile, ungi wako we nkongo wikuhi,

uwo mo ukanuni wako wamwelisizaga Daudi?

50Zumbe kumbuka ivyo mndima ywako asezengwe,

ivyo hujijimiza mo umoyo wangu,

mahuluto ya wantu wose.

51Zumbe Chohile, wankondo wako wamhuluta seuta ywako usagule!

Wambela yudya uhakile mavuta hohose naite.

52Mtogoleni Zumbe Chohile kale na kale!

Taile! Taile!