Ntogozi 88

Ndilo ya kulombeza wambizi

1Zumbe Chohile, mwambula ywangu msi wose,

na chilo chose naila kulongozi kwako.

2Malombezo yangu yabule kulongozi kwako,

tega gutwi wive indilo yangu.

3Kwaviya nna nkunto zilozize,

ujima wangu wihajihi na kubanika.

4Miye nisaviya na wadya wehaguhi na kubanika,

sitenda saviya msokezi hena nguvu.

5Sikwa hamwenga na wadya wabanike,

saviya wachinjigwe wagonile mwe izimbnila,

awo hukuwakumbuka vituhu,

awo wasentigwe hale na weye.

6Kunidula mwe bome tali vitendese,

mwe lwina lwa ziza ditendese.

7Uzami wa amaya yako utendesa mwangu,

kunisulumiza kwa mawimbi ya kwihiwa kwako.

8Kunisente na wambuya zangu wa hajihi kujinka wose,

kunitenda ihizo mwawo.

Sigwizwa sikudaha kuchupuluka,

9meso yangu yengila luzuyu lwa chinyulu.

Zumbe Chohile, nakwitanga chila zuwa,

kuno sichulusa imikono yangu kwako nalombeza.

10Togola, weye walagisa mpituko zako mwe wantu wabanike?

Togola, wadya wafile wadaha kwinuka na kukutogola?

11Togola, ungi wako watambaliswa mwe mbila,

hegu ukanuni wako hantu ho ubanasi?

12Togola, mpituko zako nayamanyike hantu he chiza,

hegu ntendwa zako zo uwagilwa mwe isi ijaligwe?

13Mna miye nakwilila weye, Weye Zumbe Chohile ywangu unambize,

chila mtondo nalombeza kwako.

14Zumbe Chohile, ni mbwani wanilemela,

na kuhitukila hale na miye?

15Kukongela ubwanga wangu sisulumizwa kenga nibanike,

singilwa ni nkama zako sifa chevu.

16Maya yako yazamisa mwangu,

kunebunga kwako kukutisa kunibalanga,

17msi wose yanitandama saviya nkulujumbu ya mazi,

yanifinankiza vitendese.

18Kunusiza wambuya zangu na wadya hungisa,

chiza chitenda nuyo mbuyangu ywa hajihi kujinka wose.