Ntogozi 86

Kulombeza wambizi

1Zumbe Chohile nitegela gutwi, unihitula,

kwaviya miye ni mchiwa na msokezi.

2Dima uwikazi wangu, kwaviya seika kwako,

weye wi Chohile ywangu,

mwambule mndima ywako akukwiya msuhi.

3Zumbe Chohile, niwonela mbazi miye,

kwaviya nakwitanga msi wose.

4Mwinke mndima ywako chinyemi,

kwaviya kwako weye Zumbe Chohile,

malombezo yangu nayaonya kwako.

5Zumbe Chohile, weye wi ywedi na mta kulekeila,

kumema ungi kwa wadya wose wakukwitanga.

6Zumbe Chohile, tega gutwi wive amalombezo yangu,

tegeleza indilo yangu uniwonele mbazi.

7Mwe idizuwa dye izinkuto zangu nahwitange,

kwaviya weye nonihitule.

8Zumbe Chohile, hagatigati he milungu hahana akwinga weye,

hahana ntendwa za kuliganywa ne izako.

9Zumbe Chohile, wantu wose umbile mwe izisi naweze kwako,

na kuvika kulongozi kwako,

nawaditunye idizina dyako.

10Kwaviya weye wi mkulu naho nodamanye mbuli za kwehela,

weye ichedu ni weye Chohile.

11Zumbe Chohile, nihinya isila yako,

nami nanijende mwe ichindedi chako,

ninka moyo hewikukanganya,

vileke nidahe kukuvikila.

12Zumbe, Chohile ywangu nahutogole kwa moyo wangu wose,

nanitambalise idizina dyako kale na kale.

13Kwaviya ungi wako ukulisa kwangu!

Kunambula kulawa kwe idibome hedine uhelo wakugona wabanike.

14Zumbe Chohile, wata kweduvya wanebunga,

bunga dya wantu manyakwili dyaunga dinikome,

wantu hewe kukutunya weye.

15Mna weye Zumbe, wi Chohile ywa mbazi na wedi,

hwi mhufu ywa kwihiwa, mna kumema ungi na ukanuni.

16Nihitukila naho unifile mbazi,

ninka nguvu naho nambula,

umwambule mwana ywa msuntaviya ywako.

17Ninka chilagiso cha wedi wako,

chani wankondo wangu wachiwone vileke wengile soni,

kwaviya Weye Zumbe Chohile kunambiza na kunitondowaza.