Ntogozi 85

Malombezo isi ichumilwe

1Zumbe Chohile walagisaga wedi mwe isi yako,

wamvuzizaga Yakobo ujimbikwa wakwe.

2Walekeilaga uwavu wa awantu wako,

na kugubika amasa yawo yose.

3Waikaga amaya yako yose hankanda,

naho kuhituka na kuleka ukali wo ukwihiwa kwako.

4Chohile mwambula ywetu,

uchiwiye vituhu, usa amaya yako mwetu.

5Togola, nochihiwe kale na kale?

Maya yako nayajendeleze mwe ivyeleko vyose?

6Chwiye vituhu,

suwe awantu wako nachikutogole.

7Chilagise ungi wako hewine udumo,

Weye Zumbe Chohile, chinke wambulwa wako.

8Nanitegeleze chiya akulonga Zumbe Chohile,

kwaviya alongaga mbuli ya utondowazi kwa awantu wakwe,

uneva hawanawiye uhezi wawo.

9Chindedi wambula wakwe wihajihi na wadya wakumvikila,

vileke ung'azi wakwe usigaile mwe isi yetu.

10Ungi na ukanuni vyadugana hamwenga,

uwagilwa na utondowazi vyahampikana.

11Ukanuni nausuke kulawa mweisi,

uwagilwa wa Chohile nausele hasi kulawa kwembingu.

12Heye, Chohile nachinke chintu chedi,

isi yetu nailavye ulozo ulozese.

13Uwagilwa naulongole kulongozi kwa Chohile,

na kudamanya sila kwachausa che izinkacho zakwe.