Ntogozi 84

Nkina ya kuvika mwe Inyumba ya Chohile

1Zumbe Chohile Mta Nguvu Zose,

wikazi wako ni mtana vitendese!

2Miye nahaungisa nitendeke umo!

Najelejeza nitende mwe izinyuwa ze Inyumba yako weye Zumbe Chohile.

Umoyo wangu no umwili wangu vyamwilila Chohile Mta Ujima.

3Hata nofi zizenga masasa mwe Inyumba yako,

wambayumbayu wazenga masasa ya kuwanguila machinda yawo hajihi ne imazabahu yako,

Weye Zumbe Chohile Mta Nguvu Zose,

seuta na Chohile ywangu.

4Wajimbikwa wadya wakwikala mwe Inyumba yako,

mazuwa yose wakuchemela weye ntogozi.

5Wajimbikwa wadya izinguvu zawo zikwako,

ne izisila zikuhinga Sayuni zimwe imyoyo yawo.

6Wakajinka mwe idikolongo dinyaile dya Baka,

dyahitukila kutenda na soko za mazi,

iviya fula za vuli zadimemeza kwa maloko.

7Wajendeleza kukula na nguvu,

kubula chila yumwenga abule kulongozi kwa Chohile uko Sayuni.

8Zumbe Chohile Mta Nguvu Zose,

unive amalombezo yangu,

nitegela gutwi weye Chohile ywa Yakobo.

9Zumbe Chohile,

mjimbike seuta ywetu, seuta usagule.

10Zuwa dimwenga kwikala mwe Inyumba yako,

ni vyedi kujinka mazuwa elufu imwenga hantu hatuhu,

vyawagile nitende mwamizi mwe izinyuwa ze Inyumba ya Chohile ywangu,

ukaleka kwikala mwe mahema ya watu wavu.

11Kwaviya Zumbe Chohile ni mwamizi ywetu seuta akuchilangaziza,

Zumbe alavya wedi na ntunyo,

hahana chintu chedi akuwanyima wadya hewene mlema.

12Zumbe Chohile Mta Nguvu Zose,

kajimbikwa yudya akwika msuhi mwako.