Ntogozi 83

Malombezo mwe wankondo wa Izulaeli wahudwe

1Chohile usekunyamala dwii,

usekunyamala weye Chohile naho usekutongomala.

2Kaula! Wankondo wako wajesa ngavungavu,

wadya wakukwiihiwa wenuila imitwi yawo.

3Wadamanya mizungu mwa awantu wako,

walafya mwa wadya ukungisa.

4Wagamba, “Soni chiwakome awantu we isi yawo,

chani idizina dya Izulaeli disekukumbukwa vituhu.”

5Wevana kwa moyo umwenga,

waika cheliso mwako,

6wantu Waedomu na Waishimaeli,

na Wamoabu na Wahagali,

7Wagebeli na Waamoni na Waamaleki,

na Wafilisiti hamwenga na wantu wa Tilo.

8Iviya Wasiliya walungana nawo vileke wawambize awelekwa wa Lutu.

9Wadamanye saviya uwadamamanye awantu wa Midiani,

nasaviya uwatendile Sisela na Yabini komto wa Kishoni,

10awo wakomigwe uko Endoli niyo watenda saviya mazagalika mwe isanga.

11Watende amasekulu wawo saviya uwatendile Olebu na Zebu,

wahude ivilongozi wawo saviya uwahudile Zeba na Zalumuna,

12awo wagambaga, “Nachiitahe isi ya Chohile itondowale.”

13Chohile ywangu, wafilise saviya malumbi ya luzimu,

saviya makanka yakufiliswa ni mpeho.

14Saviya moto ukutikimya mbago,

hegu saviya myali ya moto ikoka magulu,

15nivyo nowabalaze awo kwa nkung'unto yako,

na kuwasokeza kwa nkomano yako.

16Gubika izinyuso zawo kwa soni,

chani wamanye izinguvu zako weye Zumbe Chohile.

17Awo wajelwe soni na kuhayuswa kale na kale,

awo wakomwe kwa soni.

18Wamanye kugamba weye, ukwitangwa Zumbe Chohile,

ni weye ichedu wi Kulanga Vitendese mweisi yose.