Ntogozi 81

Nchemo ya ngasu

1Mchemeleni kwa chinyemi Chohile eli nguvu yetu, uyo akuchidima,

mchemeleni ntogozi Chohile ywa Yakobo!

2Chemani, towani miluli,

towani magunda na mazeze kwa lungole lwedi.

3Towani magunda ya mahembe ya ndolome,

umo mwezi ukatontomoka,

na umo ukatenda mkungilo mwe idizuwa dye ingasu yetu,

4ino ni sigilizi kwa Izulaeli,

lagizo dya Chohile ywa Yakobo.

5Awalagizaga awantu wa Izulaeli,

umo wamlawaga mweisi ya Misili,

uko chevaga izwi hechidikombaganye,

6“Susa imizigo mwa amayega yawo,

siwausizani ntangulu zizamile mwe imikono yenyu.

7Mwe izinkunto zako wanitangaga miye niyo nakwambula,

nakuhitulaga mwe maingu yana mlulumo,

nakujezaga kwa amazi ya Meliba.

8Nyuwe wantu wangu, tegelezani miye naniwafundeni,

navitende vyedi hegu mwanitegeleze nyuwe Waizulaeli!

9Asekutendeka mwako mnungu mtuhu,

msekuvikila mnungu ywa chijeni.

10Miye ni Zumbe, Chohile ywako hulavize kweisi ya Misili.

Gubula umlomo wako miye nahwankize.”

11“Mna awantu wangu hawaungaga kunitegeleza,

Waizulaeli hawakunitunya miye.

12Elo, niyo nawaleka wasigane no unkani wawo,

watimile viya wakunga wenye.

13Navitende vyedi hegu awantu wangu wanitegeleze,

hegu awantu wangu watimile izisila zangu,

14nasisunguza kuwahuda awankondo wawo,

nasichulusa umkono wangu kuwatowa wadya wakuwabunyanya.

15Wadya wakumwiihiwa Zumbe Chohile nawawanyanyahale kulongozi kwakwe,

nkanto yawo naitende ya kale na kale.

16Mna nyuwe Waizulaeli namliswe ngano ntana,

na kuwegusani kwa uchi ukulawa mwe luwe.”