Ntogozi 80

Malombezo ya kuhonywa isi

1Mdimi ywa Izulaeli, tega gutwi dyako, ukuwalongoza welekwa wa Yusufu enga bunga dya ngoto.

Weye ukwikala mlanga mwe vyumbe vina mawawa vikwitangwa makelubi, chilangazize,

2kulongozi kwa amakabila ya Efulaimu na Benjamini na Manase.

Chilagise izinguvu zako wize uchambule.

3Chohile, chivuzize udahi wa nkongo!

Chilagise mbazi zako, vileke chambulwe!

4Chohile Mta Nguvu Zose,

kubula ini nofile maya amalombezo ya awantu wako?

5Mesozi kuyatenda nayo inkande yetu,

kuchinywesa mesozi yalozize.

6Kuchitenda chibelwe niwantu we mjihi na suwe,

wankondo wetu wachitila.

7Chohile Mta Nguvu Zose, chivuzize udahi!

Chilagise mbazi zako vileke chambulwe.

8Kuleta mzabibu kulawa Misili,

kuwabalaza awantu we izisi ntuhu niyo wauhanda mwe isi.

9Kufyekula nkonde kwachausa chakwe,

maizi yakwe niyo yadindimala,

niyo watantamka mwe isi yose.

10Magulu nayagubikwa kwe ichizuli chakwe,

amatambi yakwe niyo yagubika imiti ye mielezi mikulu.

11Matambi yakwe yatima kubula kwebahali,

suko yakwe ibula Komto.

12Ni mbwani kubogozola iviwambaza vyakwe?

Wose wakujinka watunde izizabibu zakwe.

13Maguluwe mbago yaubalanga,

na wanyama wa kwezinkonde wedila du.

14Weye Chohile Mta Nguvu Zose chiwiye!

Chikaule kuno hasi kulawa kwembingu,

so uchambule tunduliya umzabibu wako,

15wamile umosa uhandile kwa mkono wako wa kulume,

mwana chilume uleile kwachausa chako mwenye.

16Mzabibu ukantwa na kuitimpwa moto,

wasinye awankondo chimayamaya na kwabalanga!

17Mkono wako wikile mlanga mwa yudya mntu usagule,

uyo umjeile nguvu kwachausa chako mwenye.

18Suwe hachijeze kuya kunyuma kukwasa weye vituhu,

chinke ujima, suwe nachikutogole.

19Zumbe Chohile Mta Nguvu Zose,

chisinye kwa wedi wako, vileke chambulwe.