Ntogozi 79

Lombezo dya mbazi mwa Yelusalemu

1Chohile, wantu hewekumanyize wayebunga isi yako,

wajela uzavu mwe Inyumba yako ikukile,

na kuutenda mahame umzi wa Yelusalemu.

2Ivimba vya awantu wako wavileka vitende nkande ya magushu ya mo ulanga,

imili ya awakuka wako itende nkande ya makala ya kumbago.

3Wetila isame yawo saviya mazi komzi wa Yelusalemu,

wagonezwa umo naho hahana ywa kuwahamba.

4Chitenda chintu cha soni mwa wetu wakuchizunguluka,

wachibela na kuchitendela utilizi.

5Weye Zumbe, mbuli zino zaheza ini?

Togola nowihiwe kale na kale?

Maya yako nayake saviya moto kubula ini?

6Maya yako yawemukile awantu we izisi ntuhu hewekumanyize weye,

mwe iziseuta hewedimanyize idizina dyako.

7Kwaviya wawakoma awantu wako,

naho waibalanga isi yako.

8Usekuchikantila kwa chausa cha wavu wa wakale wetu.

Mbazi zako zisunguze kuchizila,

kwaviya chife chevu vitendese.

9Chohile Mwambula ywetu chambize,

kwachausa cho ukuka we idizina dyako,

chihonye na kuchilekeila amasa yetu.

10Kwambwani watu mwe izisi ntuhu wagambe,

“Chohile ywenyu ekuhi?”

Chidahize chiwone ukawalihiza awantu we izisi ntuhu,

ukomi wa awandima wako.

11Tegeleza indilo ya wadya wafungigwe,

na kwa udahi wako mkulu wafungule wadya wakantilwe kukomwa.

12Zumbe walihize chikoda awantu we mnkanda mwetu nkanana mfungate,

kwa chausa cha amahuluto wakuhulute weye Zumbe.

13Aho, suwe awantu wako, ngoto ukudima,

nachikutogole kale na kale.

Ntogozi zako nachizitamwile cheleko kwa cheleko.