Ntogozi 78

Chohile na wantu wakwe

1Nyuwe wantu wangu, tegelezani amahinyo yangu,

tegelezani imilosi hulonga.

2Nanilonge kwa milosi ya lufyambo,

nanilonge mbuli zefisize, mbuli za chikale,

3mbuli chivile na kuzimanya,

ziya chigambilwe ni wakale wetu.

4Mbuli izo hachiwafise wenetu,

nachiwagambile awelekwa we icheleko chikwiza ntendwa zikuwagila ntogozi za Zumbe Chohile,

udahi wakwe na mpituko adamanye.

5Kalavya malagizo kwa awantu wa Izulaeli,

na sigilizi kwa awelekwa wa Yakobo.

Kawalagiza awakale wetu wawahinye awana wawo,

6chani cheleko chikwiza chizimanye, hamwenga

na awana wakunga welekwe, vileke awo nawo wawagambile awana wawo.

7Mwe isila iyo nawaike msuhi wawo kwa Chohile,

vileke wasekujala viya adamanye,

mna mazuwa yose watimile izisigilizi zakwe.

8Ivyo hawaligane na wakele wawo,

awo wendaga hewekwiva na wankani,

moyo yawo yendaga midala,

awo loho zawo hezendaga na ukanuni kwa Chohile.

9Wantu we idikabila dya Efulaimu,

hatahegu wendaga na mita na mifulo,

wasumkaga zuwa dya nkondo.

10Hawatozize idilagano dya Chohile,

walemela kutimila izisigilizi zakwe.

11Wajala ayo adamanyaga,

mpituko wawone akadamanya.

12Umo Chohile akadamanya mpituko wakale wawo wawona,

uko kwe idibwandasi dya Soani mweisi ya Misili.

13Katula ibahali haidi na kuwombosa wajinke,

kayatenda amazi yachimale lujunju saviya chiwambaza.

14Nomsi kawalongoza kwa ingu,

na nechilo kawalongoza kwa lumuli lwa moto.

15Katula luwe kwedijangwa,

na kuwenka mazi yalozize saviya bahali.

16Kahosa soko za mazi zilawe mwe luwe,

na kulavya mazi yalozize saviya mto.

17Mna wajendeleza kumdamanyiza mbuli za masa Zumbe Chohile,

uko kwedijangwa wamhituka Uyo Ekulanga Vitendese.

18Wamdamanyiza kasidi wamjeza Chohile mwe imyoyo yawo,

wakaunga nkande ziya wakunga wowo.

19Walonga milosi mwa Zumbe Chohile wakagamba,

“Togola, Chohile adaha kuchinka nkande kweidijangwa?

20Eze atowe uluwe mazi niyo yalawisa,

wamto niyo waguluka mazi yalozize.

Mna togola adaha kuchinka nkande chindedi,

na nyama suwe wantu wakwe?”

21Elo, Chohile eze aweve, niyo ehiwa vitendese,

kawaselezeza moto uwatikimye awantu wakwe,

maya yakwe yawemukila Waizulaeli,

22kwaviya nendile hawana uzumizi kwa Chohile,

hegu kwikiya msuhi wambulwa wakwe.

23Hata ivyo kalagiza maingu ya kulanga,

niyo avugula izinyivi za kwembingu,

24kawalagaziza nkande ikwitangwa mana vileke wantu wadye,

kawenka ngano ya kwembingu.

25Ivyo, wantu wadya mkate wa wandima wa kwembingu,

kawegaila nkande ikudaha kuwegusa.

26Kahosa nkung'unto kulawa ulailo wa zuwa kwembingu,

na kulongoza nkung'unto ya kwamwenyemzi kwa udahi wakwe,

27na awantu wakwe kawaselezeza nyama ilozize,

wadege walozize enga msanga wa mpwani.

28Chohile katenda awadege wagwele mgati mwe izinkambi zawo,

kuzunguluka amahema yawo.

29Wantu wadya na kusigaza,

kwaviya kawenka chiya nawakabesa.

30Mna umo hewenati kubinda ukudya chiya nawakabesa,

wachei kutafuna mwe imilomo yawo,

31maya ya Chohile niyo yawemukila,

vyaleka awakoma wadya wendaga na nguvu kujinka awatuhu mwawo,

kawagwisa hasi awabwanga wa Izulaeli.

32Hamwenga ne izimbuli zose izo,

wajendeleza kudamanya mbuli za masa,

naho hawazumile izintendwa zakwe za mpituko.

33Elo, niyo ahosa amazuwa yawo yasile saviya muye,

ne imihilimo yawo mwe nkama ikutisa.

34Umo Chohile ahosaga awamwenga wawo wabanike,

wasigaile wamhitukila, weila na kulombeza kwa kuhikiliza.

35Wakumbukaga kugamba Chohile ni luwe lwawo,

kugamba Chohile Ekulanga Vitendese endaga mwambula ywawo.

36Mna imilosi yawo yose yendaga ya udanti,

walonga mbuli zo udanti,

37myoyo yawo yendaga haichumile kwa Zumbe Chohile,

naho wendaga sawo wakanuni mwe idilagano dya wowo na Chohile.

38Mna, endaga na mbazi, kawalekeila uwihi wawo naho hawakomile.

Chila nkanana kachinda amaya yakwe naho hasongile amaya yakwe yose.

39Akumbukaga kugamba awo ni wantu du wata kubanika,

saviya mpeho ikujinka heikuya vituhu.

40Nkanana nyingahi wakale wetu wamhituka Chohile kwedijangwa,

nkanana nyingahi wamjela chinyulu kwenyika!

41Wamjezaga Chohile nkanana zilozize,

wamjelaga maya Uyo Mkuka ywa Izulaeli.

42Wajala udahi wakwe mkulu,

ne idizuwa diya awakombolaga kulawa mwa awankondo wawo,

43zuwa alagise vilagiso vyakwe vya kwehela,

uko kwedibwandasi dya Soani mweisi ya Misili.

44Kahitula amazi mwe imito yawo yatenda sakame,

Wamisili niyo waswesa mazi ya kunywa.

45Awegailega mafyo ya si niyo yawaluma,

na majula yavavagala mwe isi yawo.

46Niyo egala sije zidye viya wahandile,

na fyasa kubalanga izinkonde zawo.

47Kabalanga imizabibu yawo kwa fula ya mayuwe,

ne imikuyu yawo kwa fula ihangane na mabalafu.

48Ng'ombe zawo kazileka zinyelwe ni fula ya mayuwe,

amabunga ya awanyama wawo kayatowa kwa lumwemwe.

49Kawemukila kwa ukali wa maya yakwe,

kewemukila maya, chinyulu na unkondo hamwenga,

saviya bunga dya wandima wa kwembingu wakubalanga.

50Kayalekeila amaya yakwe yajendeleze,

hawenegeze na file,

mna kawakoma kwa unyonje wa tauni.

51Akomaga awelekwa wa nkongo wose wa chilume mweisi ya Misili,

malimbulo ye izinguvu zawo zo ubwanga mwa amahema ya Hamu.

52Akaheza niyo awasamiza enga ngoto,

kawalongoza kwedijangwa saviya fyo dya ludimo.

53Kawalongoza mpeho, naho hawogehe,

mna ibahali iwafinangiza awankondo wawo.

54Elo, niyo awegala kubula komhaka we isi yakwe ikukile,

kolugulu ludya atahile mwenye.

55Niyo awabalaza awantu we izisi ntuhu kulongozi kwawo,

na kuwasangila izisi zawo zitende ulisi wawo,

kawasangila isi amakabila ya Izulaeli na kuwaika mo wikazi wawo.

56Mna wowo niyo wamjeza Zumbe Chohile,

na kumhituka Uyo Ekulanga Vitendese,

naho hawazitimile izisigilizi zakwe,

57mna wahitukilaga saviya wendaga wakale wawo,

hawendaga wachumi hegu wakanuni,

niyo wenga saviya uta uvunike hewikwambiza chintu.

58Wamjela maya Chohile kwa muntu mwawo mwinukile mwa kuvikila milungu,

wamwihiza kwa amatukulu yawo.

59Chohile eze aweve niyo ehiwa vitendese,

elo niyo awalemela awantu wakwe pwilili.

60Niyo adileka idihema dyakwe komzi wa Shilo,

uko aikaga wikazi hamwenga na suwe.

61Niyo adigala ko utumwa Idishanduku dye izinguvu zakwe,

ung'azi wakwe mwe imikono ya awankondo.

62Kaweihiwa awantu wakwe mwenye,

niyo awalavya wakomwe kwa mabamba.

63Wabwanga wawo watikimya ni moto,

na wachiche wawo waswesa ywa kuwasola.

64Walavyantambiko wawo wakomagwa kwa mabamba,

mna wavyele wawo wasize hawajezize kwila.

65Aho, Zumbe niyo enuke saviya mntu akusetuka mwe ntongo,

enga mkankalu asangalazwe ni divai.

66Awatowaga na kuwahuda awankondo wakwe,

niyo awajela mwe soni za kale na kale.

67Mna kawalemela awelekwa wa Yusufu,

hadisagule idikabila dya Efulaimu,

68mna kasagula idikabila dya Yuda,

Ulugulu lwa Sayuni ulo aungile.

69Kazenga ahantu hakwe hakukile,

saviya aho akwikala uko kwembingu,

engaviya atogeze isi kale na kale.

70Niyo amsagula Daudi mndima ywakwe,

na kumlavya mwe ndima ya kudima ngoto,

71Kamlavya mwe ndima ya kudima ngoto na wana ngoto,

vileke atende na ndima ya kudima awantu wa Yakobo wantu wakwe.

Awadime Izulaeli wantu wa Zumbe Chohile mwenye.

72Dadi niyo awadima kwa uchumi wa moyo wakwe,

na kuwalongoza kwa uwagilwa.