Ntogozi 77

Kujelwa moyo chipindi za nkunto

1Nasimwilila Chohile vileke anambize,

nasiwilila vileke anive.

2Nasimlonda Zumbe umo nendile mwe nkunto,

nechilo sichulusa mikono hehena kusokela,

mna moyo wangu ulemela kuhozwa.

3Umo nongile nimkumbuke Chohile nasungumilwa,

nafanyanya kubula iloho yangu yafa chevu.

4Kuleka ameso yangu yasekugubika chilo chijima,

siwona nkama niyo nadunduga kulonga.

5Sifanyanya mbuli zomboke chikale,

mihilimo ilozize ijinkile.

6Nechilo nakumbukaga nchemo zangu,

nafanyanya mo umoyo wangu,

neuza mwenye mwe iloho yangu.

7“Togola! Chohile nachilemele suwe kale na kale?

Togola hachitendele yedi vituhu?

8Ungi wakwe hewine udumo usila?

Togola hachintize vituhu ndagano yakwe alongaga?

9Togola Chohile kajala mbazi zakwe?

Kachinda mbazi zakwe kwachausa cha amaya yakwe?”

10Vikaheza niyo nafanyanya,

“Chino nicho chikunilumiza umoyo wangu, ni kugamba

Chohile Mkulu kahituka hakuchitwndela chintu kwachausa chetu!”

11Nanikumbuke ntendwa za Zumbe Chohile,

heye nanikumbuke mpituko zako udamanye chikale.

12Nanizifanyanye izindima zako zose,

na kulungumula izintendwa zako zikulise.

13Chila chintu udamanye weye Chohile chikuka.

Ni yuhi mnungu mkulu akwinga weye Chohile ywetu?

14Weye wi Chohile ukudamanya mpituko,

ukulagisa udahi wako mwa awantu we izisi ntuhu.

15Kwa udahi wako kuwambula awantu wako,

lweleko lwa Yakobo na lweleko lwa Yusufu.

16Mazi yeze yakuwone weye Chohile niyo yogoha,

ne imizumilizo ye ibahali niyo yazingiza.

17Maingu niyo yanyesa fula,

izimbingu niyo zalavya mwemwe na milulumo ya mbaula,

misale ya mamuli yapulika chila ntendele.

18Milulumo ye izimbaula zako zivika mwe nkung'unto ya luzimu,

lumwemwe lupulika mweisi,

isi niyo yazingiza na kusingisika.

19Sila yako ijinkila mwe ibahali,

kujinkila mwe mizumilizo ya mazi yalozize,

hataivyo lwayo lwako haluwoneke.

20Kuwalongoza awantu wako saviya bunga dya ngoto,

kwa ulongozi wa Musa na Haluni.