Ntogozi 76

Chohile ni mhuda

1Chohile kamanyika mwa Yuda,

zina dyakwe ni kulu mwa Izulaeli.

2Idihema dyakwe diyuko Salemu,

wikazi wakwe ni Sayuni.

3Uko nuko afyoile imifulo ikupulika ya awankondo,

ne izinchinga zawo ne izisime hamwenga na viziha vyose vya nkondo.

4Weye wapulika kwa ung'azi!

Wisaviya mkankalu akulawa kwe magulu,

yana ugoli wa wanyama nyika.

5Wagomba nkondo wawo wakankalu watahigwa,

wagona ntongo fofofo,

hahana hata mgomba nkondo yumwenga akudaha kwinula imikono yakwe atowane.

6Kwakuwakwahila kwako weye Chohile ywa Yakobo,

falasi na amalingisha yawo vinyamala dwii.

7Weye ichedu ni weye ywa kogohigwa.

Hahana akudaha kuchimala kulongozi kwako,

umo weye wihiwe.

8Kutambalisa nkanto kulawa kwembingu,

isi niyo yogoha na kunyamala dwii,

9umo weye Chohile winuke kukantila,

kuwambula wadya wose waziligwe mweisi.

10Kwaviya kuweihiwa kwako awantu nakukutogole,

wadya wachulupuke mwa amaya yako nawambulwe.

11Mchintizeni Zumbe Chohile, Chohile ywenu viya mlongile,

nyuwe mwihajihi mwinkeni majeleko Chohile akogofya,

12uyo akanta loho za vilongozi,

ogohigwa ni maseuta mwe izisi zose.