Ntogozi 74

Kulombeza wambizi isi yambulwe

1Weye Chohile, ni mbwani kuchidula?

Togola nowafile maya awantu wako mwenye kale na kale?

2Kumbuka awantu wako usagule mwenye chikale,

kabila wambule ditende ulisi wako.

Kumbuka ulugulu lwa Sayuni uko wekalaga.

3Jinka mlanga mwa amahame yano ya chikale,

ubanasi wose uno uhoswa ni mnkondo mwa ahatu hakukile.

4Wankondo wako wabumo uhuda mwe Inumb yako,

waika izibendela zawo zitende vilagiso vyo uhuda.

5Wadamanya saviya wantu wenule hoya,

chani wakante imiti mwa amasaka yose.

6Watula ivintu vyose vye izimbawo kwa hoya na nyundo,

nyivi idolonywe vyedi.

7Wahatimpa moto ahantu hako hakukile,

wahajela uzavu ahantu hako ukuvikilwa.

8Welongela mwe imyoyo yawo kugamba,

“Nachiwabinde pele!”

Chila hantu akuvikilwa Chohile mwe isi wahoka.

9Hachilagiswe vilagiso vya mpituko,

hahana muoni asigale,

naho hahana hata yumwenga amanyize vino naviheze ini.

10Weye Chohile, wankondo nawatile kubula ini?

Togola wankondo nahulute idizina dyako kale na kale?

11Ni mbwani walemela kuchambiza?

Nimbwani hukuchulusa umkono wako?

Ulavye kulawa uko uukunjize vileke uwakome

12Hata ivyo, Chohile ni seuta ywangu kukongela chikale,

wegala wambula mweisi.

13Weye kuipanga ibahali haidi kwa udahi wako mkulu,

kutula imitwi ya makala makulu yakutisa mwe ibahali,

14ni weye uhondile imitwi ya Lewiatani,

kumhitusa nkande ikudingwa ni vyumbe vya kwedijangwa.

15Ni weye udamanye izisoko za amazi ne mito,

weye kunyaza imito yendile ikagulusa mazi heyekunyala.

16Msi ni wako chilo nacho ni chako,

kwika zuwa na mnenge.

17Ni weye wikiye imhaka yose ye isi,

kwika chizuwa na masika.

18Zumbe Chohile, kumbuka izimbuli izo mnkondo akutile,

ivyo wantu wahezi wabeile idizina dyako.

19Usekwinkiza ujima wa kasuwamanga kako kwa makala ya kumbago,

usekujala ujima wa awachiwa wako wakusulumizwa kale na kale.

20Kumbuka idilagano dyako,

kwaviya chila hantu hechiza mweisi hamema wavu.

21Usekuwaleka wakubunyanywa wajelwe soni,

wadahize wachiwa na wasokezi watogole idizina dyako.

22Chohile inuka ugombele ichindedi chako!

Kumbuka ivyo wahezi wakukuhuluta msi wose.

23Usekubela ulwasu lwa awankondo wako,

ngavungavu za awankondo wako zikujendeleza.