Ntogozi 73

Uwagilwa wa Chohile

1Chindedi Chohile ni ywedi kwa Izulaeli,

kwa wadya wata myoyo ikukile.

2Mna miye hadodo nekobadike,

bwene nteleze,

3kwaviya nahabesa kutenda sawadya wakweduvya,

umo niwone kuchumilwa kwa wata wavu.

4Wantu awo hawakupatwa ni masulumizo,

mili yawo idindimala naho itoga.

5Hawana nkunto zikuwapata wantu watuhu,

naho hawakusulumba saviya wantu watuhu.

6Elo, kweduvya kutenda enga mkufu mwe izisingo zawo,

wevika nkumbizi saviya suche,

7wavu walawa mwe imyoyo ya awo wajimbale,

wamalanya myalo ihiye mwe iziakuli zawo.

8Wawatila wantu watuhu na kuwalonga vihiye,

weduvya wakapanga mizungu ihiye.

9Wamlonga mbuli zihiye Chohile kwembingu,

kwa milosi yawo walongoza isi,

10elo, wantu wa Chohile wawatimila,

hawakuwona chochose chihiye mwawo,

na kuzumila chila wakulonga.

11Wagamba vino, Chohile namanye vivihi?

Togola Uyo Ekulanga Vitendese ana umanyi?

12Nivyo weli wantu wavu,

mazuwa yose hawakuvisinya, wafanyanya kujenyeza ugoli.

13Chindedi sekukiza umoyo wangu vya bule,

sisunta imikono yangu vya bule sine mlema.

14Msi wose natumbwazika,

na chila mtondo nasulumizwa.

15Hegu nalongile mbuli seizo wakulonga wantu wehiye,

nasiwahituka awelekwa wa awantu wako.

16Umo najezaga kukombaganya izimbuli izo,

zitendesa ndala kwangu kuzikombaganya,

17mna nize nite kwe Inyumba yako,

aho niyo nabunkula uhelo wawo.

18Chindedi nowaike hantu hakutela,

nowagwise hasi wabanikilwe.

19Ivyo wakusunguza kubalangwa chipumpa,

wabindwa pele kwa kutiswa,

20awo wesaviya sozi ikutazuka kukacha,

umo ukenuka weye Chohile nowatazule saviya sozi.

21Umo umoyo wangu wendile na chinyulu,

ne iloho yangu ipatile usungu,

22nasitenda saviya hezi simanyize chochose,

nanisaviya mnyama du kulongozi kwako.

23Mna nichei hamwenga na weye mazuwa yose,

kunitoza mkono wangu wa kulume.

24Wanilongoza kwa ulangilizi wako,

vileke mo udumo uningize mo ung'azi.

25Ni yuhi mtuhu ninanaye kwembingu ukaleka weye?

Isi haina chochose hunga ukaleka weye.

26Mwili no umoyo wangu vyadaha kudunduga,

mna weye Chohile wi nguvu yo umoyo wangu na fungu dyangu kale na kale.

27Kwaviya wadya wakwesunga hale na weye nawagile hale,

nowakome wadya wose sawo wakanuni kwako.

28Mna kwangu miye ni vyedi hatenda hajihi na Chohile,

Zumbe Chohile, simtenda nuyo sumkilo dyangu,

miye nanitambalise ntendwa zakwe zose.