Ntogozi 72

Kumlombezeza seuta

1Weye Chohile, mhinye seuta akantile kwa uwagilwa wako,

mwinke mwana seuta ukanuni wako,

2vileke akantile wantu wako kwa uwagilwa,

na kulongoza wachiwa kwa ukanuni.

3Magulu nayegale kuchumilwa kwa awantu wako,

wagulu wameme ukanuni.

4Seuta awagombele wachiwa mgati mwe wantu,

ambize wana wa wasokezi na kubalanga wantu wabunyanyi.

5Seuta nekalise wikazi mtali saviya zuwa,

na saviya zuwa mwe ivyeleko vyose.

6Seuta atende saviya fula ikunya mwe nkonde ifyekulwe,

saviya mawaga yakunyunya mwe isanga.

7Ukanuni naudindimale mowikazi wakwe wose,

kuchumilwa nakutendeke saviya mnenge ukulangaza.

8Alongoze kulawa kwebahali kubula kwe bahali,

kulawa komto wa Efulate kubula uhelo weisi.

9Wantu wa amakabila yakwikala kwedijangwa nawamfikile madi,

wankondo wakwe nawename walambite malumbi.

10Maseuta wa Talishishi na wa mpwani za hale nawamwigaile kodi,

maseuta wa Sheba na Seba nawamwigaile majeleko.

11Maseuta wose nawafike madi kulongozi kwakwe,

wantu wose mweisi nawamsankanile.

12Kwaviya amwambula msokezi akumlombeza,

na mchiwa hene ywa kumwambiza.

13Nawafile mbazi wasokezi na wachiwa,

nambule wikazi wa wata nkunto.

14Nawambule kulawa mwe wihi wa unyakwili,

kwaviya wikazi wawo una yombe kulu kulongozi kwakwe.

15Seuta ekalise wikazi mtali!

Ahokele majeleko ya zahabu kulawa Sheba,

wantu wamlombezeze kwa Chohile mazuwa yose,

na kumjimbika msi wose.

16Isi yose yeleke mpuluzi zilozize,

wagulu wameme ulozo,

sayadya yeisi ya Lebanoni.

Wantu wa kwemizi watime,

saviya mani kwenkonde.

17Zina dya seuta dikalise kale na kale,

ntogozi zakwe zikalise saviya zuwa.

Wantu wose mwe izisi ntuhu nawajimbikwe kwachausa chakwe,

awo nawamwitange mjimbikwa.

18Mtogoleni Zumbe Chohile, Chohile ywa Izulaeli!

Uyo ichedu adamanya mbuli za mpituko.

19Zina dyakwe dikukile ditogolwe kale na kale!

Ung'azi wakwe umemeze isi yose!

Taile! Taile.

20Uno nuwo udumo wa amalombezo ya Daudi mwana ywa Yese.