Ntogozi 71

Kulombeza kudimwa na wambizi

1Weye Zumbe Chohile, sigulukila kwako unidime,

usekunileka mpwii ningile soni.

2Kwaviya wimta kuwagila, nihonya na kunambiza.

Nitegeleza na kunambula.

3Utende luwe lwangu lwa kusumkila,

hantu nanisumkile chila nkanana, lagiza nambulwe,

kwaviya weye wi luwe lwangu na ngome yangu.

4Chohile ywangu, nambula kulawa mwa awantu wehiye,

kulawa kwe manyakwili na wantu wehise.

5Weye Chohile, msuhi wangu naika kwako,

sikwikiya lunda weye kukongela ubwanga wangu.

6Sika lunda kwako kukongela kwelekwa kwangu,

kunidima kukongela idizuwa nelekwe.

Mazuwa yose nahutogole weye.

7Wikazi wangu utenda chilozo kwa wantu walozize,

kwaviya weye wisumkilo dyangu ditogese.

8Msi wose nahutogole weye na kutambalisa ung'azi wako.

9Usekunileka mo udalahala wangu,

usekunasa hahungukilwa ni nguvu.

10Kwaviya wankondo wangu waunga wanikome,

wanisezenga na kudamanya mbuli zihiye.

11Wagamba, “Chohile kamwasa,

elo mgulukileni mumgwile,

kwaviya hahana ywa kumwambula.”

12Weye Chohile, usekutenda hale na miye,

Chohile ywangu sunguza wize unambize!

13Wose wakunihiga,

wajelwe soni na kukomwa.

Wase wakunga wanilumize,

wengile soni na kuhuza.

14Mna mazuwa yose nanike msuhi kwako,

nahutogole weye nkanana kwa nkanana.

15Naniwagambile wantu uwagilwa wako,

msi wose nanilonge wambula wako,

nanijendeleze kukutogola ulo na ulo.

16Weye Zumbe Chohile,

nahutogole kwa ntendwa zako nkulu udamanye,

nanitambalise uwagilwa wako uwodu.

17Weye Chohile kunihinya kukongela nichei mbwanga,

kubula dyelo natambalisa mpituko zako.

18Haluse miye sidalahala,

fili zangu zina fi,

weye Chohile ywangu usekunasa!

Tenda hamwenga na miye umo hatambalisa inguvu yako,

no udahi wako mwe ivyeleko vyose vikwiza.

19Weye Zumbe Chohile,

ntendwa zako zo uwagilwa zibula kulanga kwembingu.

Kudamanya mbuli zikulise,

hahali akwinga weye.

20Hata hegu kuhosa nkunto mwangu na usungu,

mna nonitogeze,

noninke ujima vituhu,

noninule vituhu kulawa hasi he isanga.

21Nojenyeze intunyo yangu,

nonijele moyo vituhu.

22Weye Chohile ywangu, nahutogole kwa malimba,

kwachausa cho ukanuni wako.

Kwa limba dyangu nahuchemele ntogozi,

weye Mkuka ichedu ywa Izulaeli.

23Nailonge kwa izwi kulu dya mbwedo,

umo hakuchemela ntogozi,

kwaviya kunambula.

24Nanitamwile ntendwa zako zo uwagila msi wose,

kwaviya wadya wose wongile wanilumize,

wajelwa soni na kuhuza.