Ntogozi 7

Lombezo dya mntu akunga uwagila

1Weye Zumbe Chohile,

Chohile ywangu nasumkila ugombezi kwako,

unambule na wose wakunibunyanya vileke unihonye,

2hegu sivyo nawanitatavule saviya simba,

nawanisabantule vihande hande hasekutenda na mntu ywa kunambula. 3Weye Zumbe Chohile, Chohile ywangu,

hegu sidamanya ayo,

naho uneva nna mlema wa kudamanya yehiye,

4naho hegu sidamanya wavu kwakwe uyo mta utondowazi na miye,

naho hegu simwebunga mnkondo ywangu hehena luhosa,

5elo, mnkondo ywangu anitimile na kunigwila, ajatangile ujima wangu mwe sanga,

na kunasa kwa file ya soni.

6Weye Zumbe Chohile inuka,

kwa maya yako wahige awankondo wangu.

Weye kulagiza uwagila udamanyike.

7Wachisanye wantu we izisi ntuhu wakuzunguluke.

Uwalongoze kulawa kulanga.

8Weye Zumbe Chohile wawakantila awantu we izisi ntuhu.

Weye Zumbe Chohile, nilagisa kugamba sina ubanasi kwaviya sina mlema,

kuligana no uwo uchumi wangu.

9Weye Chohile mta kuwagila,

ukuzuza fanyanyi na myoyo chinda ngavungavu za wata wavu,

na kuwateda wawagilwa wekale kwa utondowazi.

10Chohile nuyo nchinga yangu, uyo awambula wachumi wa moyo.

11Chohile ni mlamuzi mta kuwagila,

awakantila wadya wakudamanya wavu.

12Uneva wantu hawanahituile izisila zawo zihiye,

Chohile nanole idibamba dyakwe,

nakwese na kufyusa uta wakwe.

13Kamalanya viziha vyakwe vikukoma,

kaikoza moto imifulo yakwe.

14Kaula ivyo mntu mwihi akufanyanya wavu,

kamema ubanasi na kudanta wantu.

15Akusimba bome,

akaheza atolobela mo mwina.

16Nkumbizi akuikonga,

yamuwiya mwenye.

17Nanimtunye Zumbe Chohile kwachausa cho uwagila wakwe,

naho nanidichemele ntogozi idizina dya Zumbe Chohile Mkulu.