Ntogozi 69

Ndilo ya kulombeza wambizi

1Weye Chohile, nambula!

Kwaviya mazi yabula mwesingo.

2Nadidimila mwe mzumilizo wa ntagata,

hahana hantu he kujata.

Sididimila mwe mzumilizo wa mazi,

nakunkuswa ni mawimbi.

3Sihwa chaka kwa kulombeza wambizi,

inkongomelo yangu ikaluka.

Meso yangu yana luzuyu,

hakugoja weye Chohile ywangu.

4Wantu wakunihiwa vya bule walozesa kujinka izifili momtwi wangu.

Wadya wakulonda wanikome,

wanilongela mbuli zo udanti.

Wanikunduganya nivuze chintu sibaile.

5Weye Chohile kumanya uhezi wangu,

masa yangu hayakwefisa kulongozi kwako.

6Weye Zumbe, Chohile mta Nguvu Zose,

usekuleka wakukwikiya msuhi wengile soni kwa chausa changu,

wakukuvikila wasekuhayuswa kwachausa changu,

weye Chohile ywa Izulaeli.

7Kwaviya sijijimiza soni kwa chausa chako,

uhuza ugubika uso wangu.

8Sitenda saviya mjeni mwa walukolo wangu,

sitenda mnyika mwa wantu we ikaya yangu mwenye.

9Kuvika mwe Inyumba yako kwanoka saviya moto,

mahuluto ya wadya wakukuhuluta weye yanigwela miye.

10Nanyanyahala na kufunga,

mna wantu wanihuluta mwe ivyo hudamanya.

11Umo navalaga majuniya nilomboleze,

wantu niyo wanibela.

12Wadya wakwila mwezinchili wanitila,

sihituka nchemo ya wakozi.

13Mna miye nahulombeze weye Zumbe Chohile,

nizumila idilombezo dyangu

mwe chipindi chako usagule nonihitule,

nonambule kwa chausa cho ungi wako mkulu.

Kwaviya weye Chohile wambula wako ni wo ukanuni.

14Nambula, usekunileka nididimile mwe ntagata,

nambula mwe awo wakunihiwa,

nihonya kulawa mwe mizumilizo ya amazi.

15Usekuleka nkulujumbu ya mazi inizole,

hegu nididimile mwe mizumilizo ya mazi,

hegu nigubikwe mwe bome.

16Weye Chohile nihitula,

kwa wedi na ungi wako,

kwa mbazi zako zilozese nihitukila!

17Usekufisa uso wako kwa mndima ywako,

sunguza kunihitula, kwaviya nimwe nkunto.

18Soo hajihi vileke unambule,

nikombola kulawa kwa awankondo wangu.

19Kuvimanya ivyo hubelwa,

neivyo huhayuswa na kujelwa soni,

wankondo wangu wose kuwamanya.

20Mahuluto yaniholoza,

naho sifa chevu.

Silonda ywa kunitondowaza simpatile,

ywa kunihoza, mna siwone mndosa.

21Umo nendile na sala,

waninka nkande ijeligwe sumu,

umo nendile na nchilu wanijeila sungwi mwa amazi.

22Ngasu zawo zitende mtego mwawo,

chinyemi cha amalavyo yawo chitende tasi na kuwagwiza.

23Watule ameso yawo vileke wasekuwona,

vuna imigongo yawo igonje ulo na ulo.

24Walagise ukwihiwa kwako,

maya yako yatendese yawagwele.

25Ahantu hawo hahituse mahame,

hasekutendeka na mntu yoyose akwikala mwa amahema yawo.

26Kwaviya wawasulumiza wadya uwakantile,

wawongezeza nkwenje wadya ulumize.

27Wakantile kwa mbuli zo uwavu wawo,

usekuwaleka wehange mo uwambula wako.

28Usa amazina yawo kulawa mwe ichitabu cho ujima,

wasekudongelekwa hamwenga na awantu wako.

29Weye Chohile ninula kulanga unambule,

kwaviya miye sihwa naho nalumwa.

30Nanimtogole Chohile kwa nchemo,

miye nanimtunye kwa ntogozi.

31Mbuli ino yamuwagila vitendese Zumbe Chohile,

ukaleka kumlaviza malavyo ya ng'ombe,

ukaleka kumlaviza njeku njima.

32Umo wachiwa wanawona izimbuli izo nawelelwe,

wadya wose wakumvikila Chohile nawajelwe moyo.

33Zumbe Chohile aweva awantu mwe viya wakunga,

naho hakujala wantu wakwe watahigwe.

34Mtogoleni Chohile, nyuwe mbingu ne isi,

bahali ne ivyumbe vyose vikwikala umo.

35Kwaviya Chohile naikombole Yelusalemu,

na kuizenga uhya imizi ya Yuda.

Vikaheza awantu wakwe naweilisi na kwika wikazi wawo umo,

36lweleko lwa awandima wakwe nawailisi,

wadya wose wakudyunga idizina dyakwe nawekale umo.