Ntogozi 68

Nchemo ya ntogozi

1Chohile enuka, na wankondo wakwe watimkana,

wakumwihiwa wasumkila hale naye.

2Saviya mosi ukufiliswa ni mpeho,

seivyo uwafilise hale,

saviya nta ikulujuka mwe moto,

seivyo wavu nivyo wakubanika kulongozi kwa Chohile.

3Mna wata kuwagila nawelelwe umo Chohile akeza,

watowe nchelegele na kuchema kwa mbwedo.

4Mchemeleni Chohile, ditogoleni idizina dyakwe,

mdamanyizeni isila yakwe akukweila kwamaingu.

Zina dyakwe ni Zumbe Chohile, elelwani kulongozi kwakwe.

5Chohile akwikala ahantu hakwe hakukile,

ni tate ywa wabanikilwe ni welesi wawo

na mdimi ywa wabanikilwe ni wagosi wawo.

6Chohile awenka wachiwa wikazi wa mazuwa yose,

afungula wafungwa na kuwenka kuchumilwa,

mna wadya wakulemela kutimila yadya akulagiza nawekale mwesi inyaile.

7Weye Chohile umo wawalongozaga awantu wako,

umo watambaga kudya kwedijangwa,

8isi naisingisika, ulanga niyo wanyesa fula,

kulongozi kwa Chohile wo Ulugulu lwa Sinai,

kulongozi kwa Chohile, Chohile ywa Izulaeli.

9Weye Chohile kunyesa fula itendese,

kuyavusa isanga yo ulisi wako yendile inyalisa.

10Wantu wako waikaga wikazi wako uko,

kwa wedi wako niyo wawenka wachiwa viya wakunga.

11Zumbe nakatambalisa lagizo,

niyo, wavyele walozize watambalisa ulosi uwo,

12“Maseuta na wagomba nkondo wawo niyo wasumka!”

Niyo wavyele kwezinyumba wasangilana viya watahile,

13hatahegu wagona mwe madewa,

weye wi saviya matukulu ya wasuwamanga yahakigwe chumbu,

mazoya yawo yahamwa kwa zahabu ikung'ala.

14Umo Zumbe Chohile mta Nguvu Zose awatimulaganye amaseuta mweisi,

vyendaga saviya balafu igwele kulawa kulanga kolugulu lwa Salimoni.

15Weye luguluu lwa Chohile, lugulu lwa Bashani,

weye lugulu lwa vinenengwe vilozize, lugulu lwa Bashani!

16Ni mbwani wauwonela finju,

ulugulu asagule Chohile ekale mlanga mwakwe?

Zumbe Chohile nekale uko kale na kale!

17Akatenda na fyo dikulise,

na maelufu ya malingisha,

Zumbe eza hakukile hakwe akalawa Sinai.

18Wakwelaga kulanga na kuguha watahigwe,

wahokelaga majeleko kulawa kwe wantu,

hata kwe wantu wahitukile,

vileke weye Chohile wikale uko.

19Atogolwe Zumbe Chohile chila zuwa,

Chohile mwambula ywetu,

akuchinuila imizigo yetu chila zuwa.

20Chohile ywetu ni Chohile akwambula,

Zumbe Chohile nuyodu akuchikombola mwe file.

21Chindedi, Chohile nahonde imitwi ya awankondo wakwe,

wadya wose wakutimila sila zawo zihiye za masa.

22Zumbe alongaga, “Naniwavuze awankondo wenyu kulawa Bashani,

naniwavuze kulawa kwe imizumilizo ye ibahali,

23chani usunte iviga mwesakame ya awankondo wako,

makuli yako yadye fungu dyawo.”

24Weye Chohile lukudidi lwako lo uhuda luwoneka,

ludongo lwa Chohile ywangu, seuta ywangu, kubula hakukile hakwe.

25Kulongozi weyuko wachemi, kunyuma weyuko wavini,

hagatigati hana wachiche wakutowa wagoma.

26Mtogoleni Chohile momdugano wa awantu wano.

Mtogoleni Zumbe Chohile nyuwe bunga dya Waizulaeli!

27Ywa nkongo ni Benjamini, mdodo mwa wose,

vikaheza vilongozi wa Yuda ne idibunga dyawo,

vikaheza wakulu wa Zabuloni na Nafutali.

28Weye Chohile, lagisa inguvu yako nkulu,

no ukulu wako ujeseze kwachausa chetu,

29kulawa kwe Inyumba yako Yelusalemu,

uko maseuta nawakwigaile majeleko yawo.

30Wakwahile wadya awanyama wakwila kwamani,

fyo dya mavulata na majeku,

kubula awantu awo we izisi ntuhu wakwinke ntunyo na kodi.

Wamwaganise awantu awo wakungisa nkondo!

31Wasigilwa naweze kulawa Misili,

wantu wa Kushi nawenule imikono yawo wakamvikila Chohile.

32Nyuwe seuta za mweisi, mchemeleni Chohile,

mchemeleni Zumbe nchemo za ntogozi,

33mchemeleni ntogozi uyo akwikala mwe imbingu,

kukongela chikale na kale.

Mwetegelezeni akabuma kwa mbumo mkulu.

34Ivilikizani inguvu nkulu ya Chohile,

uyo alongoza mwa Izulaeli,

udahi wakwe wabula ko ulanga.

35Chohile atisa umo akeza kulawa hakukile hakwe,

uyo ni Chohile ywa Izulaeli!

Awenka awantu wakwe nguvu na udahi.

Atogolwe Chohile!