Ntogozi 66

Kumtogola Chohile kwa wedi wakwe

1Nyuwe wantu wose mkwikala mweisi,

mtogoleni Chohile kwa nchelegele!

2Chemani ukulu we idizina dyakwe,

mwinkeni ntogozi!

3Mgambeni Chohile,

“Ntendwa zako zehela vitendese!

Udahi wako ukulisa, vyaleka awankondo wako wafika madi kulongozi kwako kwa nkama.

4Chila mntu mweisi akuvikila weye,

wakuchemela ntogozi,

wadichemela ntogozi idizina dyako.”

5Soni mkaule mbuli atendile Chohile,

katenda mbuli za kutisa mwa awantu.

6Ahituilaga ibahali kutenda hantu hanyaile,

wantu niyo wamboka umo lwa viga.

Suwe niyo chatowa nchelegele kwachausa cha ntendwa zakwe.

7Alongoza kale na kale kwa udahi wakwe mkulu,

meso yakwe yasinya wantu wose mwe isi.

Hasekutenda na mnkani yoyose akumhiga.

8Mtogoleni Chohile ywetu,

nyuwe wantu wose mweisi,

tambalisani ntogozi zakwe vileke zivike.

9Uyo kachinka ujima,

naho hachilekile chigwe.

10Weye Chohile kuchijeza,

kuchisunta mwe moto saviya mayuwe ya chumbu.

11Kuchihosa chigwizwe mwe lwavu,

kuchitwisa nkunto zizamise.

12Kuwaleka awankondo wetu wachijate,

chijinkila mwe moto na mazi,

mna haluse kuchileta hantu he ulozo.

13Nanize mwe Inyumba yako na amalavyo yo kutikimya,

na kuchintiza izinazili zangu kwako,

14nilongile na kwelisa miye mwenye umo nendile mwe nkunto.

15Nahulavize ntambiko za kutikimya zidamanise,

na ntambiko kutikimya za ndolome,

nahulavize ntambiko za ng'ombe na mbuzi.

16Soni mwetegeleze nyuwe nyose mkumvikila Chohile,

miye naniwagambileni viya anitendele.

17Kwa izwi nasimwilila wambizi,

ntogozi zakwe nendile zimolulimi lwangu.

18Hegu nafisize wihi mo umoyo wangu,

Zumbe Chohile nendile hanitegeleze.

19Mna chindedi Chohile kaniva,

heye, ketegeleza imilosi ya amalombezo yangu niyo anihitula.

20Atogolwe Chohile,

kwaviya halemele amalombezo yangu,

hegu kusa ungi wakwe kwangu.