Ntogozi 65

Nchemo ya ntogozi

1Weye Chohile wawagila ntogozi uko Sayuni,

wantu nawachintize izinazili zawo,

2kwaviya weye weva amalombezo yetu.

Wantu wose naweze kwako.

3Chikazamilwa ni masa yetu,

weye mweye wachilekeile.

4Ujimbiko wi mwe wadya awantu usagule na kuwegala hajihi,

wekale mwe izinyuwa zako.

Suwe cheguswa ni wedi we inyumba yako,

wedi we Inyumba yako ikukile.

5Wachihitula kwa ntendwa zikwehela zikuwagila na kuchambula,

weye Chohile mwambula ywetu,

ni weye msuhi we ivyumbe vyose,

mweisi yose na wakwikala ntendele ya kaidi ye ibahali.

6Kusika amagulu ahantu yeli kwa udahi wako.

Weye walagisa izinguvu zako.

7Wanyamaza mjubwaniko we bahali,

na msindo wa amawimbi yakwe,

wachinda ngavungavu za wantu.

8Wantu wose mweisi wehelwa ni izintendwa zako.

Wahosa mbwedo chila hantu,

kukongela ulailo wa zuwa kubula uswelo wa zuwa.

9Weye watalamkila isi kwa kuinyeseza fula,

wainka ulozo na kuitondowaza, mto wako umema mazi ndwaa,

waidahiza isi na kuinka ulozo.

Ivyo nivyo uidahize isi,

10kwigala fula nkulu kwezinkonde na kuzichabaza kwa mazi,

isanga waitohola kwa mawaga,

na kuijimbika imimea isuke.

11Mhilimo wose wawinka yedi yako,

chila hantu ujinkile hajimbikwa.

12Madimilo yamema wanyama,

magulu nayo yamema mbwedo.

13Madimilo yamema ngoto,

mabwandasi yamema ngano.

Chila chintu chelelwa kwa mbwedo.