Ntogozi 64

Kulombeza kudimwa ni Chohile

1Weye Chohile, unive amavuzumo yangu,

dima uwikazi wangu,

kwaviya wankondo wanitisa.

2Nidima kulawa mwe injama za wavu,

kulawana na mabunga ya wantu wehiye.

3Wanola izindimi zawo saviya bamba,

wafyusa milosi ikulasa saviya misale.

4Wadula misale kulawa uko wefisize wamwebunga mntu mkanuni,

wamwebunga chipumpa hawekogoha.

5Watintisana mwe imizungu yawo ihiye wakunga,

wevana ivyo nawafise imtego yawo.

Wagamba, “Hahana nadahe kuiwona.”

6Wadamanya njama zihiye wakagamba,

“Chifanyanya mwalo uchumile!

Ni yuhi nabunkule umwalo wetu?”

Mwalo wa chinyele ufiswa mwe moyo wa mntu.

7Mna Chohile nawalase kwa misale,

na kusunguza kuwalasa.

8Nawabalange kwachausa che imilosi yawo,

chila nawawone nasingise umtwi kwa chihovu,

9na wantu wose nawogohe. Nawatambalise izimbuli adamanye Chohile,

na kusungulumanaya izintendwa zakwe.

10Wakanuni nawelelwe kwa Zumbe Chohile,

na kusumkila ugombezi kwakwe,

wata myoyo ichumile nawamtogole uyo.