Ntogozi 63

Nkwina ya kutenda na Chohile

1Weye Chohile, weye wi Chohile ywangu,

miye nakulonda kwa moyo wangu wose,

loho yangu ikalukwa saviya mntu akalukwe,

sikalukwa saviya sanga inyaile heina mazi.

2Sikuwona ahantu hako hakukile,

niwone inguvu yako no ung'azi wako.

3Kwaviya ungi wako ni wedi kujinka ujima,

kwa chausa icho miye nahutogole kwa mlomo wangu.

4Nahutogole mazuwa yose yo ujima wangu,

naninule imikono yangu halombeza kwako.

5Loho yangu nayelelwe enga sivavula nkande ya ngasu,

kwa lungole nanichema ntogozi zako.

6Hatenda molusazi nahukumbuke weye,

chilo chose nahufanyanye weye,

7kwaviya weye ni weye wambizi ywangu,

hasi he ichizuli cha amawawa yako nanicheme kwa mbwedo.

8Loho yangu yatimilana na weye,

mkono wako wa kulume wanidindimaza.

9Mna wadya wakunga wanikome nawatolobele,

nawaselezwe hasi kowikazi wa wabanike.

10Nawakomwe kwa bamba,

nawatende nkande ya mauzi.

11Mna seuta nelelwe kwa chausa cha Chohile,

wadya wose wakwelisa kwa zina dya Chohile nawamtogole,

mna milomo ya wadanti nainyamazwe.