Ntogozi 62

Chohile nuyo akunidima

1Namgoja Chohile uyodu kwa kutondowala,

wambulwa wangu walawa kwakwe.

2Uyodu nuyo luwe lwangu na wambulwa wangu,

uyo ni ngome yangu sanijeze kusingisika.

3Namnebunge kubula ini?

Togolani mwaunga mnikome kubula ini,

miye sikala saviya lukwikwi lwiname,

saviya chiwambaza chikubogozoka?

4Mwekamba mnigwise kulawa ahantu hangu he ntunyo,

mbwedo wenyu ni kulonga udanti.

Mwalonga milosi ikutamila,

mna mwe myoyo mwaligita.

5Namgoja Chohile uyodu kwa kutondowala,

kwaviya msuhi wangu nawika kwakwe.

6Uyo ichedu nuyo uluwe lwangu na wambulwa ywangu,

uyo ni ngome yangu sanijeze kusingisika.

7Wambulwa wangu na ntunyo yangu vyalawa kwa Chohile,

kwaviya luwe lwangu lukulu na sumkilo dyangu ni Chohile.

8Nyuwe wantu ikani msuhi kwa Chohile mazuwa yose,

mgambileni Zumbe yadya yemwe myoyo yenyu.

Chohile nuyo sumkilo dya ugombezi wetu.

9Wantu wose ni saviya muye du,

wose hawakwikiwa msuhi.

Naho, hata ukawahima hawakubula chilo,

wose chahamwenga wahuha kujinka muye.

10Msekwegamila mwe kubunyanya,

msekweduvila ugoli wo ubavi,

hata ugoli wako ukajenyela usekuwikiya msuhi.

11Chohile kalonga ulosi umwenga,

miye simwiva nkanana mbili,

kugamba nguvu zose ni zakwe Chohile,

12naho mbazi ni zakwe Zumbe Chohile,

weye wamliha chila mntu kuligana ne izintendwa zakwe.