Ntogozi 52

Nkanto na mbazi za Chohile

1Weye mkankalu kwambwani weduvya wihi wako?

Mna ukanuni wa Chohile ni wa mazuwa yose.

2Chila nkanana wamalanya ubanasi,

lulimi lwako ni saviya wembe ukukola!

Lwalonga mbuli zo udanti uwodu.

3Weye waungisa wihi ukaleka wedi,

waungisa kulonga udanti ukaleka kulonga ichindedi.

4Waungisa milosi ikubalanga wantu, waungisa lulimi lukolonga udanti.

5Mna Chohile nakuseleze hasi kwa ubanasi wa kale na kale,

nakupempule na kukusa chinguvu kulawa mwe inyumba yako,

nakuse mwe isi ino wakwikala wata ujima.

6Wantu wata uwagilwa nawawone na kogoha,

nawamseke wakagamba,

7“Kaula yano yambwile yudya mntu,

hemwikiye msuhi Chohile atende ngome yakwe,

mna keikiya msuhi mo ugoli wakwe,

endaga chobala ywa kukoma weyawe.”

8Mna miye ni saviya mti wa mzaituni,

ukutima mwe Inyumba ya Chohile. Nanikiye msuhi mbazi zakwe kale na kale.

9Nahutogole kale na kale kwa mbuli utendile,

nanikiye msuhi idizina dyako,

kwaviya zina dyako ni dyedi.

Nahutogole kulongozi kwa wantu wako.