Ntogozi 51

Lombeza kulekeilwa

1Weye Chohile, niwonela mbazi,

kuligana no ungi wako hewine udumo,

kuligane ne izimbazi zako zilozize nusiza ubanasi wangu.

2Unisunte umlema wangu wose,

unisunte amasa yangu.

3Nazumila pwilili ubanasi wangu,

mazuwa yose nayawona amasa yangu.

4Sikubalanga weye ichedu,

sidamanya mbuli zihiye kulongozi kwako.

Elo, viya ukulamula viligana,

nkonto zako hazina mlema.

5Chindedi miye ni mbanasi kukongela kwelekwa kwangu,

mta masa kukongela mwe inda ya mame.

6Weye waunga ukanuni ukulawa mndani,

elo nihinya ubala.

7Unisunte kwa kahuto ka hisopo, nami nanikuke,

unisunte miye naning'ale chwee saviya sufi.

8Ninka mbwedo na chinyemi,

nibwedeza vituhu, miye mavuha uhondile hondile.

9Usekukaula amasa yangu,

usa umlema wangu wose.

10Weye Chohile numbiya moyo wedi,

idamanye uhya iloho yangu na ya ukanuni.

11Usekunidula hale na weye,

usekunusiza iloho yako Ikukile.

12Nivuziza vituhu umbwedo wo wambulwa wako,

ninka moho wa kunyanyahala unidindimaze, unijendeleze husankanile.

13Aho naniwahinye wabanasi izisila zako,

na wata masa nawakuwiye weye.

14Weye Chohile, Chohile ukunambula,,

nambula mwe mlema wa kwitila sakame,

miye nanicheme kwa izwi dya chinyemi, kwachausa cho uwagila wako.

15Weye Zumbe Chohile, nidahiza kulonga,

vileke nitambalise ntogozi zako.

16Weye hukuwagizwa ni ntambiko,

kona sivyo miye nasikwigaila.

Weye hukubweda malavyo ya kutikimya.

17Ntambiko yangu kwako weye Chohile ni loho yedi,

weye Zumbe Chohile hukulemela moyo uchumile na ukunyanyahala.

18Weye Zumbe Chohile, unge kuutendela yedi umzi wa Sayuni,

uzenge uhya iviwambaza vyo umzi wa Yelusalemu.

19Aho nahatende na ntambiko zikuwagila,

malavyo ya kutikimya na ntambiko za kutikimya vijima,

naho njeku nazilavigwe mwe imazabahu yako.