Ntogozi 50

Mviko wa chindedi

1Chohile Mta Nguvu, Zumbe Chohile kalonga,

kawetanga awekazi we isi yose,

kulawa ulailo wa zuwa kubula uswelo wa zuwa.

2Kulawa Sayuni, mzi mtana vitendese,

Chohile elaviza na kulangaza.

3Chohile ywetu neze, hanyamale.

Moto ukutikimya naumlongoile,

kazungulukwa ni nkung'unto ikulise.

4Kulawa kwembingu netange imbingu ne isi,

ziukule umo akawakantila awantu wakwe.

5Chohile agamba, “Wachisanyeni awantu wangu wakanuni,

wadamanye lagano na miye kwa ntambiko!”

6Izimbingu zatambalisa ukanuni wa Chohile,

kugamba Chohile mwenye ni mkanta.

7Naho agamba, “Tegelezani nyuwe wantu wangu, icho hulonga!

Weye Izulaeli nalavya ukuzi mwako.

Miye ni Chohile, Chohile ywenyu.

8Sikukukwahila kwachausa che izintambiko zako,

hegu malavyo ya kutikimya ukunilaviza chila nkanana.

9Ichindedi sikunga ugoli we ididewa dyako,

hegu vulata mo umungo wako,

10kwaviya wanyama wose kumbago ni wangu,

na amafyo ye izing'ombe kulanga kwa amagulu ni zangu.

11Wadege wose wa kumbago siwamanya,

ne ivyumbe vyose vikwezinkonde ni vyangu.”

12“Hegu nendile na sala sakugambile weye,

kwaviya isi yose ne ivintu viyumo ni vyangu.

13Togola wafanyanya miye nadya nyama za njeku,

hegu kunywa sakame ya mbuzi?

14Ntogozi itende nuwo umviko wako kwa Chohile,

chintiza izinazili zako kwa Chohile ekulanga vitendese.

15Nitanga mwe zuwa wimwe nkuto,

miye nahwambule, weye nonitunye.”

16Mna Chohile amgamba mntu mwavu,

“Wazitajizani izisigilizi zangu vyabule?

Kwambwani walonga ukalanga idilagano dyangu?

17Weye wayehiywa amahinyo yangu,

naho hukunga kutimila imilosi yangu.

18Ukawona mbavi wajesanya naye,

welunga hamwenga na wachilanga.

19Mlomo wako waujeseza kulonga mbuli zihiye,

ndima yo ululimi lwako nikulonga udanti.

20Wasika dindili wawalongalonga walukolo wako,

na kuwazigiliza weyawo.

21Kujesa izimbuli zose izo miye sinyamala dwii,

togola wafanyanya miye niseivyo weye?

Mna haluse nahukwahile na kukulaha mo lumpe.”

22“Fanyanyani vyedi izimbuli zino, nyuwe mkumjala Zumbe Chohile,

hegu sivyo naniwakomeni hahatende na ywa kuwambulani.

23Akulavya ntambiko ya ntogozi anitunya miye,

akutimila izisila zangu uyo nanimwambule.”