Ntogozi 49

Uhezi wa kwegamila ugoli

1Iveni imbuli ino nyuwe wantu wose!

Tegelezani nyuwe wantu wose mkwikala mweisi ino,

2tegelezani nyose, wakulu kwa wadodo,

wagoli na wachiwa kwahamwenga.

3Milosi yangu naitende ikuhinya,

miye nanilonge mbuli zo ubala.

4Nanitege gutwi netegeleze vyelongele,

nanitambalise lufyambo kwa zeze.

5Sanogohe mazuwa yehiye,

umo hatenda sizungulukwa ni wavu wa awankondo,

6mna wantu wavu wegamila ugoli wawo,

na kweduvila vintu vilozize wananavyo.

7Mna hahana mntu yoyose akudaha kumwambula mnyawe,

hegu kumwinka Chohile maliho kwachausa cho ujima wakwe,

8kwaviya maliho yo ujima wa mntu yakulisa,

hahana maliho yoyose yakwenela,

9yamdahize ajendeleze kwikala mweisi kale na kale,

asekuwona file.

10Chila yumwenga awona kugamba hata wata ubala wabanika,

mahumbwinya iviya hamwenga na wantu wahezi wafa.

Wose awo wawasiza ugoli wawo watuhu.

11Izimbila zawo nazitende ni izinyumba zawo kale na kale,

ni wikazi wawo vyeleko kubula vyeleko,

hata hegu aho nkongo nendile wana migunda yawo.

12Mna mntu, hatahegu atunywiswa,

hekale nabanike saviya mnyama.

13Uno nuwo udumo wa wadya wakweduvya chihezi,

na uhelo wa wadya wakuzumila kutimila imilosi yawo.

14Walongozwa saviya ngoto kubula kwedibome hedine uhelo,

file naitende mdimi ywawo.

Nawasele ulo na ulo kwe izimbila.

Imili yawo naiwoile uko,

isi ya wabanike naitende wikazi wawo hale ne izinyumba zawo ze ichigoli.

15Mna Chohile nanambule ujima wangu,

nanikombole kulawa mwe nguvu za file.

16Usekwehelwa mntu akatenda mgoli,

hegu ugoli wakwe ukajenyelesa,

17kwaviya haguhe chochose umo akabanika,

ugoli wakwe hawite hasi hamwenga naye.

18Hatahegu mo wikazi wakwe kewona kabweda,

na kutogolwa ni wantu kwachausa cha kuchumilwa,

19nelunge hamwenga na wakale wakwe wamlongoile kubanika,

awo hawawone vituhu ulangazi.

20Mntu akutunyiswa hena umanyi,

esaviya mnyama akukomwa.