Ntogozi 48

Sayuni mzi wa Chohile

1Zumbe Chohile kakulisa,

awagila kutogoleswa mo umzi wa Chohile ywetu, mo ulugulu lwakwe lukukile.

2Lugulu lwa Sayuni ni lutali naho lwawagiza,

nkongelo ya mbwedo mweisi yose.

Ulugulu lwa Sayuni lwaliganywa na amagulu ya Sofani,

ni wikazi mkulu wa Seuta Mkulu.

3Chohile nuyo izingome yakwe,

elagisa saviya mwamizi ywakwe.

4Maseuta wechisanya,

niyo waita hamwenga wakuwebunga Sayuni.

5Mna weze wauwone umzi wa Sayuni, niyo wehelwa,

na kwingilwa ni nkama wasumka.

6Nkama nkulu iwatoza,

niyo watozwa nusungu saviya mvyele akwefungula,

7kuwabalanga saviya meli za Talishishi,

zivunigwe ni nkung'unto ya ntendele ya ulailo wa zuwa.

8Mbuli zose chivile chiziwona wenye,

momzi wa Zumbe Chohile ywetu, Mta Nguvu Zose,

Chohile nautogeze mazuwa yose.

9Chikatenda mwe Inyumba yako

weye Chohile, chafanyanya izimbazi zako,

10Weye Zumbe saviya idizina dyako dikutogolwa chila hantu,

ntogozi zako zabula uhelo weisi.

Mkono wako walongoza kwa uwagila,

11Lugulu lwa Sayuni lwelelwa!

Imizi ya Yuda nawatowe nchelejele,

kwachausa che izinkato zako.

12Talamkilani uko Sayuni, mkauzunguluke,

wazani iminala yakwe.

13Vikauleni iviwambaza vyakwe,

zikauleni izingome zakwe,

vileke mdahe kuvitamwila vyeleko vikwiza kugamba,

14“Yuno Chohile, ni Chohile ywetu kale na kale!

Natende chilongozi ywetu kale na kale.”