Ntogozi 5

Malombezo ya Kudimwa

1Weye Zumbe Chohile,

tega gutwi wive imilosi yangu,

wetegeleze ivyo huugula.

2Tegeleza indilo yangu vileke unambize,

Seuta ywangu na Chohile ywangu,

kwaviya weye ni weye hukulombeza.

3Weye Zumbe Chohile,

mavukuvuku wadiva idizwi dyangu, mtondo nakwigaila malombezo yangu,

vikaheza nagoja unihitule.

4Weye suyo Chohile ukubweda wihi,

mntu mta wavu mwako hakudaha kwikala.

5Wantu wakweduvya hawakudaha kuchimala kulongozi kwako,

weye wawehiwa wose wakudamanye yehiye.

6Wawabalanga wose wakulonga udanti,

wawehiwa wakomi na wadanti.

7Mna miye, kwa mbazi zako nkulu,

nanize mwe inyumba yako,

kwa kunyanyahala nanifike madi kuhinga kwe Inyumba yako ikukile.

8Nilongoza, weye Zumbe Chohile,

mo ukuka wako, kwaviya wankondo wangu wekamba wanebunge,

ike isila yako mwazi kulongozi kwangu.

9Mwe imilomo yawo hamna uchindedi,

mwe myoyo yawo wamema ubanasi,

chiya wakulonga ni udanti ukuhosa file,

ndimi zawo zalonga udanti.

10Weye Zumbe Chohile, wavyalute kwa mlema wawo,

wagwe kulawana ne imyalo yawo wenye,

wabalaze kuse kwa masa yawo yalozize,

kwaviya wakuhituka weye.

11Mna welelwe wadya wose wakusumkila kwehonya kwako, wacheme kwa nchelegele mazuwa yose.

Wadime wadya wakudyunga idizina dyako,

vileke watowe nchelegele kwachausa chako.

12Kwaviya weye Zumbe Chohile,

wawajimbika wata kuwagila, wawadima kwa wedi wako saviya nchinga.