Ntogozi 4

Malombozo ya chisingi kwachausa cha wambizi

(Nchemo ya Daudi)

1Weye Zumbe unihitule umo hakulombeza,

Weye Chohile ywangu ukunusiza mlema!

Nonambize mwe izinkunto zangu,

niwonela mbazi na kwiva idilombezo dyangu.

2Weyangu nyuwe namnibalangile ntunyo yangu kubula ini?

Kubula ini namunge mbuli zo uhezi na kulonga udanti?

3Mmanye kugamba Zumbe Chohile kesaguila mkanuni kwachausa chakwe.

Zumbe Chohile aniva chila hamwitanga.

4Zingizani kwa nkama, naho msekukola masa,

umo mkatenda mwe izisazi, mnyamale dwii mkafanyanya.

5Lavyani ntambiko zikuwagila'

na kumwikiya msuhi Zumbe Chohile.

6Wantu walozize wauza, “Ni yuhi akudaha kuchidamanyiza mbuli zedi vituhu!

Uchikaule kwa wedi, weye Zumbe Chohile!”

7Mna miye kuninka mbwedo ukuile mo umoyo,

kujinka awo wata na ngano na divai ilozese.

8Umo hagona nanipate ntongo kwa utondowazi,

kwaviya weye Zumbe Chohile ichedu ni weye ukunika mpeho.